uMthunywa
Nkosilathi Sibanda
UMDLALO wokugijima kuleli ulakho ukuguqula impilo zabantu, ikakhulu nxa ilizwe lingaqina ngokuqhuba imincintiswano lokuphakamisa ithalenta elisakhulayo.
Lokhu kuvezwe ngumgcinisihlalo weBulawayo Athletics Board (Bab) uWatson Madawanyika kungxoxo abelayo lentatheli kaMthunywa ngoLwesibili mayelana ngesimo somdlalo wokugijima kulelidobho.
UMadawanyika uthe akuzange kwabalula ukuthi umdlalo lo usukume ngemva kokumiswa isikhathi eside yikuqhamuka komkhuhlane weCovid-19. Lesi kwabayisikhathi inengi labasakhulayo elalahlekelwa ngamathuba nanko akuzange kube lomncintiswano phose iminyaka emithathu.
Covid-19
Intsha eyahlaselwa kakhulu kwaba yileyo efunda ezikolo zikaHulumende ngoba lakhathesi akulamncintiswano wokugijima ezikolo lezi.
Kungumbono kaMadawanyika ukuthi ngaphandle kokuthi kuqhutshwe eminye imincintiswano engekho ezikolo, ithalenta lomdlalo lizancipha.
Ngokunjalo, inhlanganiso ye-Bab isincome amankampani lamaqembu aseqoqe imincintiswano etshiyeneyo ngenhloso yokuthuthukisa umdlalo.
“Ngesikhathi sicabanga ukuthi umdlalo wethu usuphansi, sebekhona abasincedisayo ukuze umdlalo wethu koBulawayo ukhanye,” kubika uMadawanyika.
“Isikhathi seCovid-19 asizange sibesihle emuntwini wonke. Abagijimi bethu abazange bathole ithuba lokuncintisa, ikakhulu labo abasezikolo. Kodwa ngokuza kwabancedisi bethu, ababalisi amakilabhu lamabhizimusi, umdlalo usukhula. Abagijimi sebeqala ukuthola amathuba. Siyakubongela lokhu.”
Sports and Recreation Commission
Okukhulunywa ngumkhokheli weBab kuqinisekiswa yikusungulwa kweqembu leHouse of Champions eselizakhele udumo koBulawayo ngokuvuselela umdlalo wokugijima.
Kulandela ukuqhutshwa komjaho owaba yimpumelelo ngenyanga edluleyo, ikolitshi lokugijima eleHouse of Champions lihlele njalo omunye umncintiswano omkhulu kumaviki amabili azayo eWhite City koBulawayo.
Kubikwa ukubhalisa kulabo abafuna ukuncintisa sekuvuliwe ngemali esukela kudola leMelika kumbe i$1 000 yakuleli kwabasakhulayo. Kubikwa intsha izakhipha i$US2 kuthi abadala babhadale i$US3.
Imincintiswano izakuba khona kumango esukela ku100m, 200m, 400m, 800m, 1 500m, 3 000m, 5 000m, Long jump, triple jump, high jump, shot put, discus, javelin, hammer throw, 4x100m mixed relay, le-4x400m relay.
Ikolitshi leHouse of Champions leli lasungulwa nguPresley Mabhena owake waba ngumqeqetshi lomdlali we-triple jump.
“Yikho esikukhankaselayo lokhu. Abagijimi bethu abaphiwe inkundla ezinje ukuthi bazibonakalise. Sithi ayiqhubekele phambili iHouse of Champions.
Umqondo wokusungula ikolitshi leHouse of Champions wasukela kusidingo sokukhulisa lokulolonga ithalenta elisacathula lokuvula amathuba okuzitshengisela emhlabeni.
Ikolitshi leli lasungulwa eminyakeni embalwa edluleyo. Inhlelo zalo zokuthuthukisa umdlalo wokugijima zaphazanyiswa lubhubhane lweCovid-19. Kodwa-ke, okwakhathesi libika ukuba liqhuba
kakuhle.
Kumjaho wakuqala weHouse of Champions kwaba lamanye amaqembu ancintisayo abalisa Ihlosi, Yadah Datema Panthers, Cheetahs, Mosi Striders le Tshebetshebe.
