uMthunywa
YiNtatheli kaMthunywa
UMANDLA Mpofu kumele akhuze uvalo, angesabi ukusebenzisa abadlali alabo mhla ezakhe zihlasela kumidlalo yenkezo yeChibuku Super, kutsho abalandeli beHighlanders.
Abathandi labasekeli baleliqembu, ngobunengi babo, bathe umqeqetshi engakhathazwa yikuthi bakhona abadlali abangasoke baphiwe ithuba lokudlala, kodwa kazame ukubeka ithemba kulabo azabakhetha.
Inkundla zomdlalo wenguqu kuligi yeCastle Lager zivulwa ngoMgqibelo, ngemva kokuvalwa ngoMbimbitho ngomnyaka odluleyo.
Umqeqetshi weBosso lo, odume ngelithi Lulu, ubike ukuba inengi labadlali bakhe abathengwe khathesi abasoke babekhona kumidlalo yakuqala kuChibuku Super Cup ngoba abakatholi incwadi ezipheleleyo.
Incwadi lezi, ezibizwa ngokuthi yiInternational Clearance, kubikwa zizadindwa ngeviki lakuqala kuNtulikazi.
Ngaleso sikhathi, imidlalo yenkezo iyabe isifikisa ibanga lesibili lomncintiswano. UMpofu ubike ngokudana okukhulu esithi lokhu sekuphazamize amalungiselelo akhe. Kodwa abalandeli bamkhuthaza ukuthi aqine. Kubadlali abalakho ukukhutha imidlalo kuloJoel Ngodzo, Peter Muduhwa, Rody Sibanda, Linox Chikuhwa loKeith Mavhunga.
“Sisebunzimeni. Ukuswelakala kwabadlali laba kuzenza kubenzima ukuthi iqembu lizitshengisele ngokugcweleyo.
Sekuphazamise amalungiselelo ethu,” kutsho umqeqetshi lo.
Ubike ukuba uzabumba iqembu ekhetha kubadlali abangamatshumi amabili. Iphephandaba likazulu lixhumane labalandeli beHighlanders ababike ukuthi loba iqembu lizasala lingela abadlali abathenjiweyo, kuqakathekile ukuthi umqeqetshi walo abone icebo lokunqoba kulabo abakhona.
IHighlanders yiyo intshantshu yeChibuku Super Cup yesizini edluleyo. UQiniso Moyo umsekeli weHighlanders oseNkulumane uthe ukhulekela ukuthi incwadi zabadlali zilungiswe ngokuphangisa.
“Sidanile njengaye umqeqetshi wethu ngoba abadlali abanjengoJoel Ngodzo bayafuneka kulumncintiswano,” nguMoyo lo.
“Kumele sibone ukuthi abadlali abatsha laba basiphatheleni, manje asisoke sababona.
Kuhle ukuthi kuzanywe icebo lokuthi incwadi zabo zifike ngesikhathi singakadliwa.Okwakhathesi umqeqetshi kaqine ngalakho esandleni.”
UCynthia Siwela osekela iHighlanders eseGwanda uthe umqeqetshi uzwakale engokhala kakhulu endaweni yokuthi alungise iqembu kubadlali abakhona.
“Kakhuze uvalo kancane uMandla. Angithi ulabo abadlali abaseleyo, yikho kusayinwa abadlali abanengi, izehlakalo ezinye ziyatholakala.Njengomqeqetshi kabophe ziqine, sizasemsekela kukho konke.”
Umsekeli olodumo ezitaladeni zakoBulawayo uTeekay Sibanda uthe kuzadinga ukuhlakanipha komqeqetshi lokuzimisela kweqembu lonke ukuthi iBosso yenelise ukulwela inkezo yayo.
“Kube zindaba ezimbi ukuzwa ngesimo seqembu kusele amalanga nje ukuthi sidlale. Amanye amaqembu asebone ukuxega kweHighlanders ngakho akusoke kubengumkhankaso olula. “Inkuthazo yethu njengabasekeli abangatshintshi umbala sithi abadlali ababambane lomqeqetshi kulumango wokugcina inkezo yeChibuku Super,” kutsho umsekeli lo. Kumdlalo wokuqala weChibuku Super,
iHighlander izadlala leBulawayo Chiefs. Ngokuhlelwa loluhlu lomncintiswano lo, amaqembu akoBulawayo azadlala wodwa kusetshenziswa inkundla yeBarbourfields.
Uluhlu lwemidlalo evula iChibuku Super Cup
NgoMgqibelo
Bulawayo City v Chicken Inn (Barbourfields , 1100hrs, Whawha v FC Platinum (Mandava Staium 1300hrs, Caps United v Yadah (National Sports Stadium 1500hrs, Tenax CS v Black Rhinos (Sakubva Stadium 1500hrs
NgeSonto
Bulawayo Chiefs v Highlanders (Barbourfields Stadium 1300hrs, Ngezi Platinum Stars v Triangle United (Mandava Stadium 1100hrs . Harare City v ZPC Kariba (FC National Sports Stadium 1100hrs, Herentals v Dynamos (National Sports Stadium 1500hrs, Manica Diamonds v Cranborne Bullets (Sakubva Stadium 1500hrs.
