uMthunywa
Thokozile Mbedzi
AMAPHOLISA adlala indima enkulu ekuxazululeni inkinga ezibhekana labantu, ngakho uzulu ukhuthazwa ukuba achaze yiloba yini okumkhathazayo, njalo adinge usizo kuwo.
Lokhu kuvezwe yisikhulumi samapholisa koBulawayo, uInspector Abednico Ncube kumlayezo wakhe wokuthi abantu abaqaphele ukufaka umthetho ezandleni zabo lokufuna ukulungisa indubo ngokuzibulala kumbe ukubulala abanye.
Isixwayiso sesikhulumi samapholisa lesi, siza ngesikhathi kuvela udaba lwendoda ezibuleleyo elokitshini leNtumbane ngeSonto kuviki ephelileyo.
Kubikwa umuyi, uKelvin Magenende obeleminyaka engu-37 weNtumbane koBulawayo obengu-laboratory technician kubikwa uzibulele ngemva kokuxabana lonkosikazi.
Umufi utshiye elobe incwadi ebika ukuthi impilo isimehlule.
Ebika ngaloluda, u-Insp Ncube uthe amapholisa akhathazekile njalo acebisa uzulu ukuthi akhulumisane lawo nxa kukhona okubahluphayo.
“Njengamapholisa sixwayisa uzulu ukuthi angesabi ukhuluma lathi, ngoba engaluthola usizo lezeluleko. Sikhuthaza futhi ukuthi abantu babikele ingcitshi kweze-counselling, abafundisi, abangane lezihlobo ngoba ukuzibulala akulungisi lutho.”
Ukufa kukaMagenende kwethuse omakhelwane bakhe.
Omunye wabomakhelwane bakamuyi uMnumuzana Methembe Moyo uthe bamangele.
“Silesimanga silapha ngesenzo sikaKelvin yena ozibophele ephahleni wafa. Utholwe ngumntanakhe oleminyaka engu-9 yokuzalwa ngesikhathi evela esikolo wasetshela omunye umakhelwane, ohle wayabikela amapholisa.
