uMthunywa
Thando Dube
LIHAMBE likhudumala esikhwameni iqembu lesabelweni seMatabeleland South iBolamba Arts kumncintiswano weChibuku Neshamwari nanko phela libe ngelesithathu elizweni lonke.
IBolamba Arts, ebimele isabelo seMatabeleland South, isuke ilemali engange-$3 000 kumncintiswano obekhona ngempelaviki ephelileyo.
Iqembu elibe yingqungquthela kumncintiswano wamaqembu enza imigido yesintu lonyaka liqembu leGuruve Marimba lona ebelimele isabelo seMashonaland Central. Kunombolo yesibili bekuleqembu leMakarake Ensemble elivela eMashonaland East.
Iqembu le-Bolamba Arts lidume ngemigido lemiculo yamasiko esiSotho kanye leyesiTswana.
Ekhuluma loMthunywa uMthabisi Dube ongumqondisi waleliqembu uthe bayajabula ngokuphumelela kwabo.
“Njengeqembu siyathaba ngokuthi senelise ukuphuma singabesithathu kulumncintiswano.
“Umncintiswano lo ubungekho lula ngoba bekuhlangene intshantshu zezigaba zonke zelizwe ngakho ukuphuma singabesithathu kuyasithabisa njalo kuyasikhuthaza ukuthi siqhubekele phambili ngomgido wethu,” kutsho uDube.
Kusenjalo iqembu le-Ikhaya Arts ebelimele iBulawayo lehlulekile ukubuya liphethe isicoco ngemva kokunqotshwa ngamanye amaqembu. Uzulu wakoBulawayo ubekhangelele ukuthi iKhaya Arts izaphenduka lesicoco sakuqala njengoba nyakenye iqembu le-Ezimnyama laphakamisa idolobho lakoBulawayo.
Iqembu leBolamba Arts lasungulwa ngomnyaka ka2009 kodwa bekungumnyaka walo wokuqala ukuphatheka kumncintiswano weChibuku Neshamwari.
