Khoxo eBF… l FC Platinum, Chicken Inn leDynamos zingena kusihonqo seBosso amaviki elandelana

30 Mar, 2023 - 00:03 0 Views
Khoxo eBF…  l FC Platinum, Chicken Inn leDynamos zingena kusihonqo seBosso amaviki elandelana Abalandeli beBosso enkundleni yeBarbourfields koBulawayo

uMthunywa

Nkosilathi Sibanda

IHIGHLANDERS kumele ibonge abaphansi, iguqe ibonge njalo lasemazulwini ngokunikezwa ithuba elihle lokuthi idlalele ekhaya okwamaviki amabili elandelana.

Kuzaqala ukuvakatsha intshantshu zeligi iFC Platinum, kulandela umdlalo lomakhelwane iChicken Inn, qede lapho kuze isitha esikhulu iDynamos Emagumeni.

Lokhu kumele kuthabise bonke abakuqembu leli ngoba lithuba lokuthi lithole imiklomelo yonke lula ngoba izabe idlalela ekhaya, phambili kozhizhi lwabalandeli bayo.

Okuzakuba mqoka njalo yikuthi iHighlanders izazibuthela imali emagedini ngokungena kwababukeli. Mhla iHighlanders ivula isizini mhlaka 19 Mbimbitho, kwacaca ukuthi ababukeli bomdlalo bazangena ngobunengi. Endaweni yeSoweto kwakuyibunyonyo, lalabo abazitshela ukuthi indawo le ngeyabo, baswela lapha abangahlala khona.

Kukhangelelwe ukuthi kubenjalo kumidlalo emithathu elandelayo. Labomakhelwane iChicken Inn balindele umdlalo wabo leBosso ngoba besazi ukuthi bazaphuma enkundleni izikhwama ziqumbe imali. KoBulawayo akulathimu elabalandeli abanengi ukwedlula iHighlanders.

Kumdlalo wangeSonto leFC Platinum kuzabe kuyimpi yobungcitshi phakathi kukaBrito Baltemar loNorman Mapeza. Imbali iveza ukuthi uMapeza uyayikhulela iHighlanders. Phakathi kwemidlalo elitshumi lambili edibanise amaqembu la, iHighlanders ayikaze inqobe kuthi iPlatinum yona isinqobe kasikhombisa. Imidlalo emihlanu yaphela kungutshiki lobhanqa.

Ngomnyaka odluleyo amaqembu la adibana enkundleni yeMandava, Zvishavane emdlalweni owaphela kungakafiki isikhathi ngenxa yodlame. Inhlanganiso yePremier Soccer League yanikeza iFC Platinum imklomelo yonke yomdlalo.

FC Platinum – Umfanekiso ogciniweyo

Umsekeli kaBrito, uAntonio Torres uthe okwenzakala eminyakeni edluleyo sebekhohlwe ngakho ngoba ukuzethemba sekuphezulu kubadlali babo.

“Izinga lokuzethemba liphezulu. Ngabadlali abakwazi ukuthi kumele badlalele ukuhlohla lokunqoba,” kutsho lumqeqetshi exoxa lentatheli.

Isiphathamandla seqembu leDynamos uRichard Chihoro uvuvuzela okucatshangelwa ukuthi ngamakhathakhatha entubeni yeHwange FC ngesikhathi samahalantshisi kumdlalo wePSL ngoMgqibelo

Iqembu likaMapeza liphethe uBrian Banda owake walikhahlela kuTshilamoya ofike eZvishavane waba yimbabazane. UBanda uphenduka eBarbourfields, inkundla okuyiyo eyamnikeza udumo aselalo.

Ekhuluma lentatheli ngalumdlalo, uBanda uthe ulande ukuzotshengisa umdlalo omnandi.

“Ngumdlalo omkhulu. Sizadlalela ukunqoba,” kutsho umdlalo lo, ongafunanga ukuthi achaze okunengi.

Nansi
imidlalo
ngokugcweleyo:

NgoLwesihlanu: Herentals v Manica Diamonds (National Sports Stadium)

NgoMgqibelo: Bulawayo Chiefs v Black Rhinos Simba (Luveve) Bhora v Dynamos (National Sports Stadium), Sheasham v Yadah (Mandava), Cranborne Bullets v Chicken Inn (Baobab Stadium)

NgeSonto: Caps United v ZPC Kariba (National Sports Stadium), Highlanders v FC Platinum (Barbourfields), Triangle United v Ngezi platinum Stars (Gibbo), Hwange v Greenfuel (Luveve).

Share This:

Sponsored Links

Survey


We value your opinion! Take a moment to complete our survey

This will close in 20 seconds