uMthunywa
Ethel Ncube
KULENINA leChipale, eBinga elikhahlele umkalo ubuso kulandela ukuba ekhithize amajazi omkhwenyana asebenzileyo endlini.
Indaba le yenzakale emaviki asanda kwedlula lapho uNkosazana Elizabeth Shumba akhahlele umkakhe uMnumzana Joram Mudenda ikhanda emsola ngokungamhloniphi nanko phela ekhithize amakhondomu asebenzileyo ngekhaya.
Elinye ilunga lemuli elabizwa ngesikhathi kukhulunywa ngendaba le liveze ukuba uShumba ebesidla amalahle ngesenzo somkakhe lesi.
“Babuya kimi bedonsana bewaphethe lamakhondomu akhona ayebaxabanisile kodwa umkakhe wayelokhu ephika esemba phansi ukuthi amakhondomu la akhithike esikhwameni sakhe ethi kakwazi lokuthi afike njani kuye.
“Sazama ukuyixazulula indaba yakhona uMudenda wathi yena angeke ahlale engathwalanga amakhondomu njengendoda kumele ahlale elawo esenzela ukuba angalingeka azivikele kodwa lawa akhithika ebhulugweni mhlalokho kazilutho ngawo,” kuchaza ilunga leli lemuli.
UMthunywa uxhumane loNkosazana Shumba oveze ukuba wathukuthela kakhulu mhlalokho.
“Okwangephula umoya yikuthi kungani wabuya ngekhaya lamakhondomu asebenzileyo. Okwesibili ngangithi nxa ngimbuza ngawo athi ngithanda ukukhuluma yikho ngacina ngimkhahlela ubuso ukuze labo bafazi bangamboni.
“Amakhondomu la ayemabili, wathi engenisa isandla esikhwameni akhithika egoqiwe futhi ezikhanyela ukuthi asetshenzisiwe,” kubika uNkszn Shumba.
Iphephandaba likazulu likhulumisane lendoda le eyatshaywa ngumkayo uMnumzana Joram Mudenda obike ukuba sebalungisisa indaba le.
“Liqiniso sibili ukuthi umkami wangikhahlela ubuso ngemva kokuba kukhithike amajazi omkhwenyana esikhwameni sami. Omama yikuthi ngeke ubazwisise. Kodwa sesakhuluma ngendaba le lezimuli zethu,” kuphetha uMnu Mudenda.
