Kesixoxe lomdlali kaDlala Ngamla

26 Jul, 2018 - 00:07 0 Views
Kesixoxe lomdlali kaDlala Ngamla ULady Vee

uMthunywa

NJENGENHLALAYENZA kuleliphephandaba kuliviki silethulela enye njalo intandokazi ethandwa linengi labantu. Lintandokazi ingumhlabeleli iphinde ibe ngumlingisi.

Intombi le yaziwa kakhulu ngokudlala indawo kaSimphiwe Bhebhe kumdlalo kamabonakude u“Dlala Ngamla.” ULady Vee ukhulele khonapha koNtuthuziyathunqa njalo ithalenta lakhe liyamangalisa yikho nje leliphephandaba likhethe ukulethulela yena kuliviki.

Nansi ingxoxo phakathi kwentatheli kaMthunywa uArnold Ndlovu (AN) lomlingisi lo uLady Vee (LV).

AN: Akutsho ntombi ngembali yakho kanye leyomsebenzi wakho.

LV: Ibizo engaliphiwa ngabazali bami ngelithi Vanessa Muzarurwi. Ngileminyaka yokuzalwa engu-28, ngingumhlabeleli ngiphinde ngibe ngumlingisi njalo nxa ngisebenza ngaziwa ngelokuthi Lady Vee.

Ukuhlabelela ngakuqala ngisafunda izifundo zami zaphansi esikolo. Ekuculeni kwami ngazakala kakhulu koNtuthu ngengoma engayihlabela lomhlabeleli uSamazaza eyaba lodumo kakhulu.

Ezobulingisi zona ngiziqale nyakenye lapho engangena kuma-auditions ngaba lenhlanhla ngaphiwa ithuba lokudlala indawo kaSimphiwe kuDlala Ngamla. Okwangigqugquzela ukuthi ngingene kwezokulingisa ngabazali bami kanye labangane bami abananzelela ukuthi ngilesiphiwo sokulingisa.

AN: Njengoba ubonakala emdlalweni odumileyo koBulawayo umphakathi uthanda ukwazi ukuthi suke wathola isicoco ngemisebenzi yakho le?

LV: Imisebenzi yami yokuhlabela lokulingisa isike yangiphakamisa kakhulu ngoba sengike ngazithola ngitshintshana isiteji labahlabeleli abadumileyo eNingizimu Africa kanye laseZimbabwe abagoqela uLvovo derango loBrickz.

Kuthi ekulingiseni bengingakakhethwa ukungena ekuncintisaneni labanye abalingisi kodwa ngijabulela ukuthi umdlalo engiphatheka kuwo suke wanqoba waphiwa isicoco.

AN: Ngaphandle kokusebenza ukujabulisa abantu, yiwuphi omunye umsebenzi owenzayo?

LV: Mina loba nje sengaziwa kakhulu ngemisebenzi yami yokuhlabela lokulingisa omunye umsebenzi engiwenzayo yikuba ngu-beautician.

AN: Bunzima bani oyake uhlangane labo njengomuntu odume ngezokujabulisa abantu njalo nkuthazo bani oyipha amantombazana afuna ukungena kumsebenzi lo owenzayo?

LV: Njengomuntu othanda ukulingisa angikahlangani lobunzima obungako ngoba ngenza umsebenzi engiwuthandayo. Akukho lula khona ukulingisa kodwa ngikuthatha njengenxenye yomsebenzi hatshi ubunzima. Ngalokhu-ke kubahlabeleli labalingisi abasakhulayo ngibakhuthaza ukuthi bengenele emsebenzini lo ngokuwuthanda hatshi ukugijimisa imali kuphela, abasebenza ukujabulisa abantu bahloniphe umphakathi ngoba sisebenzela umphakathi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds