uMthunywa
Khanyile Ndebele
INHLANGANISO ebona ngezokulima eyeAgritex isixwayise abalimi ukuthi baqalise ukutshaya imbundu yokuhlanyela imbambayila njengoba isikhathi sezulu sesisondele.
UNkosikazi Treggy Mpofu, ongumlimisi wakoBulawayo uthe imbambayila ngesinye sezilimo ezihlanyelwa ngesikhathi sezulu.
“Okwakuqala okumqoka yikulungisa indawo lapho umlimi afisa ukuhlanyela khona kusana izulu lokuqala aphinde akhangele umhlabathi wakhe ukuthi ufanele yini ukulima imbambayila ngoba imila kuhle esidakeni.
“Kufanele umlimi alungise imbundu eyi-30cm kusiya ku-45cm ubude njalo wenziwa ngenhlabathi ephezulu elokudla,” kuchaza uNkszn Mpofu.
Uthe umbundu ungaba munye loba ibe mibili, okubalulekileyo yikuthi nxa uhlanyela inhlanyelo yembambayila engelampande kumele uyithandele ibe yisigombolozi uyigxumeke phansi kuthi elempande ungayigxumeka njengamanye amaxhakela afana lawembhida.
“Kulendlela ezimbili zokuhlanyela ngamaxhakela, eyokuqala ngamaxhakela alempande amanye ngangelazo impande. Alempande umlimi uyagxumeka phakathi komhlabathi wakhe besekusithi angela mpande umlimi kufanele axhumeke engathi ubopha inkatha phakathi komhlabathi.
“Ekuhlanyeleni amaxhakela umlimi kumele abone ukuthi amaxhakela akhe awalamikhuhlane kumbe kawahlaselwanga yizibungu,” kutsho uNkszn Mpofu.
“Okulandelayo yikufafaza i-lime emfolweni ozahlanyela khona imbambayila. I-lime le iyancedisa ku-pH esithi yibumunyu bomhlabathi.
“Umhlabathi kufanele ube lobumunyu obungange -5,5 kusiya ku-6pH lokhu kugcinwa yiyo i-lime. Okunye okuqakathekileyo yikuthela umquba phakathi komfolo,” kulandisa uNkszn Mpofu.
Uveze ukuthi nxa umlimi engahlanyela emfolweni oyi-2 metres, uyazuza i-20kg yembambayila.
“Ukuze umlimi abe lesivuno esihle kufanele abekhupha ezinye ingatsha, lokhu kuvikela imikhuhlane lezibungu ezingathanda ukwanda esilinyweni sakhe.
Uthe okutshengisa ukuthi sokuyisikhathi sokuvuna imbambayila yikudabuka komhlabathi lapha oyabe ulime khona njalo lokuguquka kwamahlamvu amadala awangaphansi esiba lombala olithanga.
Uphethe ngokuthi isikhathi esifaneleyo futhi esingcono sokuvuna imbambayila yisikhathi somqando lapho imbambayila eziyabe sezitshazwe ngumqando.
