YiNtatheli kaMthunywa
USOMABHIZIMUSI odumileyo uWicknell Chivayo, usebike ngokuzimisela ukuncedisa iqembu leHighlanders ukubhadala isikwelede seholo lowaye ngumqeqetshi walo uBaltemar Brito lomsekeli wakhe u-Antonio Torres.
Lokhu kuza ngemva kokuba iHighlanders inikezwe isijeziso yinhlanganiso yeFifa ngempelasonto.
I-Highlanders ilesikwelede sikaBrito se-US$14 778, njalo sesikhwele nge-US$237,71, okuyinzalo yesikwelede lesi kusukela mhlaka 17 Mfumfu 2024. Imali kaTorres yi-US$11 788, esikhwele nge-US$193,74 kusukela ngalolo suku.
Isikwelede lesi, ngokubika komgcinisihlalo weqembu, savela ikakhulu kumbadalo yokunqoba imidlalo nanko phela iholo libhadalwa yinkampani yeSakunda Holdings.
UChivayo ukhulume ngesithembiso sakhe ekhasini le-X, eveza inhloso yakhe yokubhadala isikwelede lesi.
“IBosso ngenkani! I-Team yezwe lonke. Babethi ayibulawe, ayisoze ibulawe sikhona. Ngingakuthokozela ukubhadala lesi sikwelede.”
Ukungenela kwakhe kuzaphathisa iHighlanders ekuvinjweni yiFifa, obekwenqabele iqembu ukuthi lithenge abadlali abatsha kuleli lakwamanye amazwe.
I-Zimpapers Sports Hub izwe ukuthi inkokheli zeBosso seziqalise ukuthintana loChivayo njalo kulindeleke ukuthi imali ikhitshwe iviki le ingakapheli.
Umaqhuzu weqembu uBrian Moyo uthe: “Sisebenza ubusuku lemini ukuqinisekisa ukuthi isikwelede siyabhadalwa. Sibonisana labasekeli bethu labanye esizwelana labo ukuze sixazulule lesi isimo ngokuphangisa.”
Kusenjalo, kube lenjabulo enkulu emphakathini webhola likanobhutshuzwayo, abalandeli labathandi bomdlalo bebonga lokuncoma umusa kaChivayo.
