uMthunywa
Thokozile Mbedzi
INHLANGANISO yeVeterinary Services ikhuthaza abalimi abafuyileyo kundawana zonke zelizwe ukuthi baqhubekele phambili belwisana lomkhuhlane weJanuary disease.
Ekhuluma lentatheli kaMthunywa uDokotela wezifuyo uEnart Mdlongwa uthe abafuyi kabaqhubekele phambili ngempi yokulwisa i-January disease.
“Abalimi kundawana zonke zelizwe kabaqhubekele phambili belwisana lomkhuhlane weJanuary disease ngoba ulokhe usekhona kwezinye indawo lanxa ususehla.
“Abafuyi kababe sempini yokulwisa umkhuhlane lo ngoba uyaphambanisa isibaya selizwe. Kungakho sikhuthaza abalimi ukuthi baqhubeke ngokudibhisa izifuyo zabo bangayekethisi,” kuchaza uDkt Mdlongwa.
“Izifuyo kumele zidibhiswe kathathu kumaviki amabili. Lokhu kwenziwa ngenhlonso yokuthi kube lesiqiniseko sokuba imikhaza ingatholi ithuba lokuba ihlasele izifuyo.
“Njengoba izulu lilokhu lisina abafuyi kabangahlali bakhohlwe. Kabaqhubeke njengabantu abasempini ngoba yiyo kuphela indlela esinganqoba umkhuhlane lo siphinde singalahlekelwa yizifuyo.
“Endaweni lapho umkhuhlane lo osungani ususehla abafuyi kabaqhubeke belokhu belandela izixwayiso abaziphiwa ngabe-Veterinary Services.
Uqhubekele phambili esithi bangabona inguquko abangayizwisisiyo ezifuyweni zabo kababikele abeVeterinary Services abaseduzane labo ngokuphangisa,” kuphetha uDkt Mdlongwa.
