‘Kayifinyelele emaphandleni ichess’

30 May, 2024 - 00:05 0 Views
‘Kayifinyelele emaphandleni ichess’

uMthunywa

Nkosilathi Sibanda

UKUHLALA emaphandleni akumelanga kuvimbele intsha ekudlaleni ichess.

Lo ngumbono womqondisi weChess Mates Academy, uPrisca Sibanda, oveze ukuthi isifiso sabo ngesokuthi bakhulise umdlalo lo ngokusebenza lezikolo ezinengi ekuqeqetsheni abafundi ukudlala ichess kunye lokusabalalisa umdlalo.

USibanda ukhulume lokhu ngesikhathi eveza ukuthi bathole usekelo olukhulu selokhu bavula isizini ekuqaleni kukaNkwenkwezi. Uthe loba ikolitshi labo lisedolobheni, ukholelwa kakhulu ukuthi labantwana abahlala emaphandleni kumele bafundiswe umdlalo lo.

Uthe bafuna ukusebenzisa i-chess ukuvala ukungalingani okukhona phakathi kwezikolo zasemadolobheni lezasemakhaya.

 “Sizimisele ngokusabalalisa umdlalo we-chess emakhaya. Lo ngumdlalo ongela mingcele ngakho sifuna ukudinga abadlali emaphandleni esingabafundisa siveze ithalenta labo.

 “Inhloso yethu yokufinyelela ezikolo ezisemaphandleni kayisiyo eyokuqoqa abantwana besikolo kuphela, kodwa ngeyokufundisa lokubakhuthaza ukuthi bakhwabithe ukudlala ichess ngendlela ezakuba lomthelela omuhle empilweni zabo.

Kusenjalo, umdlalo we-chess ezikolo ezisesabelweni seMatabeleland North usufinyelela ibanga laphezulu, okungumzekeliso wokuthi inhlelo zokusabalalisa umdlalo ziyaphumelela.

Umqeqetshi we-chess, uBrian Dube, oseMatabeleland North, ubikele iZimpapers Sports Hub ukuba ujabule kakhulu ngendlela abafundi bezikolo zesabelo lesi abadlala ngayo.

Uthe okwakhathesi abafundi sebelungiselela imincintiswano yeNational Association of Secondary School Heads (Nash) Scholars Chess Championships.

Esabelweni seMatabeleland South umdlalo lo uyadlalwa ngamandla ezikolo ezibalisela i-Usher High School, Solusi High School, Phakama Secondary School, Ntunungwe Secondary School, Gwambe High School, Tokwana Secondary School leThekwane High School.

Umongameli weNash u-Arthur Maphosa uthe kungumsebenzi wabo ukuqinisekisa ukuthi abafundi bayakhuthazwa ukuthi baphatheke kuyo yonke imidlalo.

“Okubalulekileyo yikhuthaza abafundi bethu kwezemidlalo. Lokhu kwenzelwa ukubafundisa ukuthi bahlole amanye amathalenta ngaphandle kwezifundo abazithola ekilasini. Indlela ichess esikhwabithwa ngayo ezikolo kuyamangalisa,” kutsho uMaphosa.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds