uMthunywa
Wayne Ncube
UKUPHELA kwenyanga kaNcwabakazi kuza lentokozo kubalandeli bomculi uMatulana ngoba ebathembisa umlilo ngedlalade lakhe elitsha elithi Kuyale lale.
Intatheli yephephandaba likazulu ikhulume lomculi u-Obadiah Matulana lapho echaza ngedlalade lakhe elitsha elithiwa Kuyale lale, eliphuma kuyonale inyanga. Kudlalade lakhe leli uMatulana ulumbana labaculi abehlukeneyo njalo abazingcitshi kwezomculo lezokuhaya.
Idlalade leli liphethe ingoma ezilitshumi eziqukethe intokozo enkulu njalo ezizakwenza inengi ligiye. Idlalade likaMatulana lokucina ngelomnyaka ophelileyo elithi “Ukuba nguBoss” njalo latshiya abalandeli begxoza indenda.
Ekhuluma lentatheli kaMthunywa u-Matulana wethule ukuba idlalade elizayo lizabe litshisa okomlilo ngoba ehlangane lenkuzi.
“Kulelidlalade kuzaba kufiwa iqiniso ngobunandi ngoba ngisebenze labosaziwayo kwezokuhlabela, abagoqela u-Albert Nyathi, uMoses Rwizi kanye loSikhangele M Matulana,” kuchaza uMatulane.
Uqhubeke waveza ukuba into emthokozise kakhulu yikuba kudlalade lakhe leli wenelise ukusebenza labantwabakhe.
“Ngisebenze kuhle labantu laba kodwa okungijabulisayo yikuthi abantwabami bayinxenye yokuphumelela komculo wami ngoba uSikhangele yindodakazi yami kanye loMthulisi Matulana onguye otshaya ama-drums yindodana yami,” ngu Matulana lo.
Uqhubekele phambili waveza ukuthi ngeke athule nje emculweni ngoba lokhu lubizo lomdeni wakhe.
“Ngiyakuthanda ukuhlabela, ngakho ngizahlala ngihlabela ngisenzela mina kanye labalandeli bami, ukuhlabela kuyinto yomdeni wakithi yikho labantwana bakubona kuyinto enhle ukukwenza.”
Idlalade likaMatulana elithi Ukuba nguBoss eliphume ngomnyaka ophelileyo laphumelela kakhulu eMzansi Africa okuyilapho athengisela khona umculo wakhe.
