uMthunywa
UMONGAMELI welizwe usazise ilizwe ngokwedlula emhlabeni kukaDokotela Sibusiso Moyo (SB) obenguMphathintambo wogatsha lweForeign Affairs and International Trade.
Kusitatimende esikhitshwe yisikhulumi sikaMongameli uMnumzana George Charamba uthe uMphathintambo Moyo wedlule emhlabeni kubangelwa ngumkhuhlane we-Covid 19 kwesinye isibhedlela.
“UMongameli welizwe uKhomuredi Emmerson Mnangagwa ulusizi ukulazisa ngokwedlula emhlabeni lamhla ekuseni (ngoLwesithathu) kukaMphathintambo wogatsha lweForeign Affairs and International Trade uSB Moyo,” utsho njalo.
UMnu Charamba uthe ilizwe lizakwaziswa ngokwenzakalayo mayelana lemfa kaSB Moyo obelisotsha elihlotshisiweyo njalo owayengumlweli wenkululeko yelizwe, ngokuya kwesikhathi.
UDkt Moyo wazalwa eMnene Mission Hospital, eMberengwa ngomnyaka ka 1960, engumntwana wesithathu phakathi kwabayisitshiyagalombili.
Wangena kwezombangazwe ngo1977 esenza isibanga sika Form Three eManama Secondary School.
Wahamba empini elomunye umzawakhe, uAir Marshal Elson Moyo, laye owayefunda esikolo esifanayo. Wasebenza kuhle empini wakhuphuka ngendlela emangalisayo njalo wasuka kusikhundla sokuba nguBrigadier General waphiwa esokuba ngu Major-General ngowayenguMongameli welizwe uRobert Gabriel Mugabe ngoZibandlela 2016.
Wasebenza engu-Major general wasekhutshulwa njalo waba ngu Lieutenant-General ngo-2017.
Mhlaka 30 Mfumfu 2017 uDkt Moyo waqokwa ukubangu Mphathintambo wogatsha lweForeign Affairs and International Trade nguMongameli Mnangagwa, isikhundla abesiphethe kwaze kwafika usuku lwakhe lokwedlula emhlabeni.
UDkt Moyo ubethethe uMahluli womthethwandaba omkhulu uLoice Matanda ongumgcinisihlalo weZimbabwe Anti-Corruption Commission (ZACC).
