YiNtatheli kaMthunywa
UMongameli welizwe uMnangagwa usekhuthaze izizalwane zakuleli zonke ukuthi zamukele izethekeli ngezandla zombili nanko seziqalile ukufika kuleli zilande i-44th Sadc Heads of State and Government Summit ezaqhutshwa eHarare.
Izithunywa ezinengi sezifikile nanko kukhangelelwe ukuba ziphatheke kuSadc Industralisation Week eqale eHarare izolo kukhangelelwe ukuthi izagqitshwa mhlaka 2 Ncwabakazi.
UMongameli welizwe kukhangelelwe ukuthi athathe isikhundla sokuba nguMgcinisihlalo weSadc kuSummit yonale ezakuba khona kusakhiwo esitsha sePhalamende eMt Pleasant.
Ekhuluma leZBC News izolo esepulazini lakhe ePrecable eKwekwe, uMongameli uMnangagwa uthe abantu kabamukele izivakatshi ngezandla zombili.
“Ngithi ebantwini bakithi eZimbabwe, kasamukeleni kuhle izethekeli zethu.
“Ngikholwa ukuthi nxa singadonsa ndawonye sizakwenelisa ukuphatha iSummit ngendlela ezahlala ikhunjulwa nguye wonke umuntu. Ngiyazi ukuthi silawo amandla okukwenza lokhu,” kutsho uMongameli welizwe.
Ukuthatha isikhundla sokuba nguMgcinisihlalo weSadc ngenyanga ezayo kuzafaka ilizwe esihlalweni esiphambili sezindaba zomhlaba njengengxenye ebalulekileyo ezindabeni zamazwe ngamazwe.
Ukuba nguMgcinisihlalo kutsho njalo ukuba uMongameli uMnangagwa uzabe eselomunye umlandu okufanele awudlale ku United Nations kunye laku Africa Union njengomgcinisihlalo weRegional Economic Community.
