uMthunywa
Vusumuzi Ndlovu
Isihloko : Ingubo Elamehlo
Umculi : Khuxxman
WAYISUSA njalo indaba esegudwini uKhulekani Bethule ngensindabaphendule yengoma! UKhuxxmann ufuna singene emqandweni sikhudumala ngengoma yakhe entsha, ethiwa “Ingubo Elamehlo”. Lapha uxoxisana lathi ngesihloko esivusa inkophe sonke isikhathi lapho esisuswa khona, kungakhathalekile ukuba ungaphi. Uyachwayisisa laye, ekhanya edingisisa ulwazi olunengi ngalo lolo daba. Asike siyicubungule kumizuzu emithathu langxanye yengoma le, lapha ehlaziya lolo daba.
Lingoma iqala ngohlobo lomculo okhandwe ngendlela ehlukileyo, ehlanganisa imidumo yalapha eAfrica efuna ukwenzela abalaleli umdumo omutsha. Lingoma iyingxoxo phakathi kukamalume lomzukulu wakhe, njalo ilokuqumbaqumba nxa usuyicabangisisa indaba abangayo kulingoma.
Ungena isahluko sakuqala ekhuluma ngesikhathi lesi esikuso khathesi, esomqando. Lesi sikhathi siqala ekucineni kukaMabasa kusiya kuNkwenkwezi, uNhlangula, uNtulikazi, kuze kube sekuqaleni kukaNcwabakazi sokuqala njalo ukutshisa. Lapha uyakhala ethi yena njengomalume, ngeke awukwanise lowo mqando osukhona kulezinsuku, ethi kala ngubo yokwembatha phakathi kwekhaza leli.
Umzukulu amphendule athi angakhathazeki, uzamenzela icebo amdingele umhlobo wengubo ozamenzela kuhle, esitsho ingubo elamehlo. Umzukulu uthi abayaziyo bayayimema, njalo laye uzayithakazelela. Aqhubeke ngokubuza umalume ukuba engayithola njani. Umzukulu amkhuthaze ukuba kabaphume endlini bayovakatsha ebantwini, yikho ukuthi amtholele impendulo yombuzo wakhe. Umzukulu amchazele ukuba ziyintofontofo njalo ziyimihlobohlobo.
