uMthunywa
Wawuzwe esikhathini abadala bethi udiwo lufuze imbiza ngoba bebona izenzo zomntwana thize zihambelana lomuntu omdala oyabe ephile ngaphambi kwakhe.
Kuvame ukuthi kuyabe kukhulunywa kunconywa njalo kubukwa izenzo ezinhle, kwesinye isikhathi lazo ezimbi kuyakhulunywa ngazo, kodwa phela akula muntu ongafuni into enhle.
Omunye umngane wami, kodwa engumuntu omdala uDlomo wathi esehlutshwe yindodana yakhe eyayisidume ngezenzo ezimbi, emthethwandaba kuye kwasokufanana lokungena emkulwini esiyafuna ilambazi. Labo mantshi basebemazi ngitsho loba sebehlangana laye emgwaqweni.
Esigabeni usobhuku wayehlezi embhaxabula ethi mhlawumbe angalahla ubuhlongandlebe, kodwa uswazi lwehluleka ukumgoba, kwangani yikho bethela iphalafini emlilweni.
Wasangana, wadideka umdala uDlomo ngoba wazama ukudla amathambo engqondo edingisisa isisusa kubokhokho bakhe kodwa kazange amthole olezenzo ezifanana lezendodana yakhe, waze waphumisela amazwi ekhuluma yedwa wathi mhlawumbe ngamaloyo, ngoba engathembi ukuthi uzenzele nje, ngoba wayesekhulume waze waphosa watsheka umlomo.
Ungakhangela kumideni esivela kuyo likhona elinye ilunga lomdeni elenza izinto ezingajwayelekanga njalo ezehlisa isithunzi somdeni. Babuzane abadala ukuthi ngabe efuze bani nxa kungumntane-ntombi impendulo ivele ibuye masinyane uzwe sekuthiwa ligola lifuze khonale koyise ongaziwayo.
Ngesinye isikhathi uyabe engafuzanga muntu amane aziqalisele umntwana, nxa eyintombazana abe ngunondindwa mhlawumbe kubangelwa zinswelo njalo lokoma kwezinto elizweni.
Nxa kulaboyisekazi bakhe abangendanga laye angehlukana lomyeni laloba ubekade emhlupha uzwa sekuthiwa ufuzile lowo babakazi, kungakhathalekile izizatho zokuthi ehlukane lomkakhe akhumbule ngakwabo.
Kuvamile ukuthi uyise womntwana thize nxa esenza okuhle uzwe umzali ezitshaya esifuba ethi ufuze yena, aze amteme ngezangelo zonke zomdeni, uthole ebobotheka esethabe abemanzi te kodwa nxa kuyizenzo ezimbi ungamfanisa laye utshaya alandule, uzwe eseqamba elinye ilunga lomdeni loba selayakobhekabezayo.
Kambe wena ungabe ufuze bani?
Ayixabene
