uMthunywa
Mashudu Mambo
UMDLALI wenguqu uKudakwashe Mahachi wehlise iphika umantshi esethula ukuba kazange azame ukubulala indodana yakhe eleminyaka emine yokuzalwa.
UMahachi ubesemthethwandaba esolwa ngokuthi watshisa indodana yakhe le ngamanzi abilayo.
Eqhuba lelicala umantshi uMark Dzira uthe indodana kaMahachi yaveza ukuba yatshiswa, yatshaywa ngensimbi nguyise kodwa ngesikhathi iphoswa ngemibuzo, yatshela umthethwandaba ukuthi kayikwazi ukuthi yalimala njani.
Umantshi uDzira uthe ubufakazi bukadokotela behlulekile ukuchaza imbangela yokulimala njengoba wayesusela kulokho akutshelwa ngumangala.
“Udokotela weMpilo Central Hospital, uDkt Tichaona Tokwe wabona amanxeba ekhanda, eqolo lasemilenzeni wangabe esahlolisisa ukuze kutholakale imbangela yalezi zilonda. Kodwa, walandela lokho akuzwa ngomamangala. Ngokunjalo, bekufanele asekele umbono wakhe ngempumela yesayensi,” kutsho uMantshi uDzira.
Ubuye wathi uMeline Mahachi loSinikiwe Sibanda abangodadewabo bakaMahachi kanye loCarlos Moyo ongumngane kaMahachi bakhulume amazwi aphikisanayo.
“USinikiwe uthe kazange abone ukuthi umntwana ulama-ring worm. Unina uMaritha Ndlovu wathi umntwana engakasuki asiya eSouth Africa, wayelama- ring worm amabili kumbe amathathu ekhanda. Ubufakazi obulethwe phambili kwenkundla abugcwalisisi lokhu ngakho umthethwandaba uthole uMahachi engelacala,” kutsho uMantshi uDzira.
UMahachi ubesolelwa ukuthi ngosuku olungaziwayo kumtshutshisi, kodwa phakathi kuka-25 Nhlolanja 2022 lo-14 Mabasa 2022, uMahachi watshaya indodana yakhe ngensimbi ekhanda lasemlonyeni.
Uphinde wasolwa ngokumtshisa ngaphambi kokuthi amtshaye ngentambo yokutshaja umzimba wonke.
Ngenxa yalokho, yatsha yaba lamanxeba umzimba wonke.
Ngemva kwalokho, uMahachi kuthiwa kazange ase indodana yakhe esibhedlela ukuze ithole usizo. Wayibuyisela eZimbabwe ngemota kamalayitsha.
