uMthunywa
Ethel Ncube
INHLANGANISO yeLivestock Farmers’ Union ikhuthaza ugatsha lweDistrict Development Fund ukuba luncedise abalimi ngokubagebhela izibholane ngentengo ephansi ukuze izifuyo zithole amanzi.
UMgcinisihlalo weLivestock Farmers’ Union uMnumzana Sifiso Sibanda uveze ukuba lonyaka izifuyo zibhekane lohlupho olukhulu lwamanzi ngakho kudingeka ukuba ingatsha zikaHulumende zincedise kutholakale amanzi ezifuyo ukuze zingafi.
Ekhuluma lentatheli uMnu Sibanda uveze ukuba abalimi balezibholane ezinlutshwana ezilamanzi.
“Izibholane ezikhona ezinlutshwane zifile, zifuna ukulungiswa njalo kudingeka ezinye. Abalimi abanengi abasemakhaya bahamba bayelagisa inkomo besenzela ukuba zithole amadlelo ngoba emapulazini kulotshani kodwa-ke okusuka kube luhlupho ngamanzi.
“Izifuyo zingaswela amanzi ziyaqala ukucuba zicine zisifa kungakho esikukhuthazayo yikuba inhlanganiso zikaHulumende ezifana leDDF zincedise abalimi abasemapulazini kugejwe izibholane ngentengo elingeneyo. Nxa kuvuma kubhalelwane phansi isivumelwano umlimi angabe eyibhadala nyanga zonke kodwa isibholane kumbe umgodi usugejiwe inkomo sezinatha,” kubika uMnu Sibanda.
Ubuye waveza ukuba izifuyo zingumnotho welizwe akumelanga ziyekelwe zisifa.
“Izifuyo zingumnotho wethu ngoba nxa zigcinakale kuhle ziyathengiswa kutholakale imali. Amanzi aqakathekile kakhulu ezifuyweni kungakho kudingakala ukuba kubanjiswane kuncedwe izifuyo zithole amanzi. Abalimi abenelisi ukuba bazigebhele imigodi kodwa badinga usizo ukuba ingatsha ezibona ngamanzi zibancedise kugejwe izibholane kumbe amadamu.
“Nxa kungagejwa amadamu akusoze kusizakale izifuyo zekhaya kuphela lenyamazana zasendle lazo ziyabuya zinathe. Kungakho siyacela ukuba kuzanywe amacebo kuncediswane kugejwe imigodi lezibholane izifuyo zingakacubi,” kuphetha uMnu Sibanda.
