uMthunywa
Mbulelo Mpofu
ABALANDELI bomdumo wamaPiano kabahlale begezile ngoba umhlabeleli kuzwa odabuka eNingizimu Africa uBabili Amos Shili owaziwa ngelokuthi “Aymos” uzabajabulisa mhlaka 9 Mabasa eBoundary koBulawayo.
U-Aymos udume ngengoma ethi Mama lenye ethi Fatela leyo ayicula loAmi Faku.
UKayla Johnson ongumqondisi weFife Street Events abayibo abaletha uAymos utshele iphephandaba likazulu ngoLwesithathu ukuthi konke kume ngomumo.
“Amalungiselelo asezingeni eliphakemeyo njengoba sesiside isikhathi simelele ubunandi,” kutsho uJohnson.
“Njengenhlalayenza, sesilungisile indaba zamaphepha afaneleyo ukuthi uAymos azejabulisa uzulu, njalo icebo elikhona ngelokuthi ahlangane labalandeli emini engakahlabeli ntambama. UAymos uyatshisa kulezinsuku, yingakho simletha lapha njengendlela yokutshengisa ukuthi siyawuthakazelela umculo wakhe.”
UJohnson uthe benze konke ngokufaneleyo njalo bafunda kumaphutha abakhona ngomnyaka odluleyo.
“Nyakenye sifunde okunengi kwezokuletha abahlabeleli lapha kwelakithi ngemva kokwenza amaphutha amanengi.
Umfanekiso lo uthethwe kuShutterstock
“Sifuna ukunyathela ngonyawo olutsha lonyaka ukuze abalandeli bajabule. Asifuni kuthi abantu becine bedakeka ngokwenza imicimbi ibeminengi ngasikhathi sinye. Sifuna ukwenza imicimbi ikakhulu ngezikhathi zamakhefu, ikakhulu sesisondele kuKhisimusi.”
Kubikwa umcimbi ka-Aymos lo ozabizwa uzaphatha indikimba ethi “All-White Party” ngoba wonke umuntu uzacelwa ukuthi avunule impahla ezimhlophe kuphela. Ngaphandle kokujabuliswa ngu-Aymos, abathandi bobunandi bazathola ukujabula okuvela kubahlabeleli bakuleli abathile abazavuthisa inkundla.
Kubahlabeleli laba kuloDJ Wellyonz, Mlungu Omnyama, Mufali, Brownie, DJ Mzoe, Henry HP loKead Wikead. UJohnson uthe abakhohlwanga laboDJ nanko umcimbi uzaqondiswa nguMtkay Ntwana osedume emicimbini eminengi ngokunandisa ngomgido.
Sekuyimvama ukuza kwabahlabeleli bevela phandle kwelizwe njalo mandulo, iFife Street Events seyaletha kwelakithi abahlabeleli abalodumo ababalisela uYoung Stanna, Daliwonga, Sir Trill, kanye loSjava.
