uMthunywa
Nkosilathi Sibanda
USIMON “Yola” Munawa wacina ukubonakala enkundleni ngesikhathi iCovid-19 ingakahlaseli.
Abathandi lababukeli bomdlalo wenguqu besebemkhohliwe ukuthi wake wadla ubhedu, wabathokozisa.
Uthe engasabonakali enkundleni, abanye bacabanga ukuthi usephelile, bengazi ukuthi usakhokha.
Umdlali lo usekhunjulwe liqembu leZPC Hwange okubikwa selilinde ukuthi angene ibhasi aqonde edolobheni lamalahle ngomnyaka ozayo. UMthunywa ukubeka mgceke njalo ukuthi iqembu leli lifuna lo-Obadiah Tarumbwa, umdlali olokhe esemlonyeni yabantu ngethalenta lalo kunobhutshuzwayo.
UMunawa, odume ngelithi “Yola” kunguqu wazakhela udumo ekumaqembu eHighlanders leChicken Inn. UTarumbwa laye wadlula kumaqembu afanayo waze wayadanela lasezikwakweni zika-Division One. Iphephandaba likazulu lithole udletshana enkambeni yeZPC Kariba oluqinisekisa ukuthi iqembu leli lifuna ukudinga abadlali “abalambileyo” abafuna ukunqoba. Kubikwa inkokheli zeqembu sezihlose ukungena kuligi yePremier Soccer League nanko selitshove amasizini amanengi lizama kodwa lisehluleka.
Iligi yeCastle Lager
Iqembu leZPC Kariba liqede likunombolo yesibili kuligi yeZifa Division One kumhlubulo ongezansi yelizwe.
“Isizame ukuphuma kuligi le kusehlula, okuyikhona okudale ukuthi inkokheli labaqeqetshi bacebisane ukuthi ukudinga abadlali abatsha kuzanceda,” kutsho umfakazi oqotho waloludaba osebenza kuleli qembu.
“Amabizo aqanjwayo afunwa ngabaqeqetshi manengi kodwa okukhanya angathi bazaqala ukubizwa ngu-Obadiah Tarumbwa loSimon Munawa.”
Intatheli yephephandaba likazulu incwetshwe indlebe ukuba umqeqetshi weZPC Hwange uNjabulo Dube usehlose ukuthi akhuphukise iqembu.
“Inhloso ekudingeni abadlali laba yikuqinisa iqembu. Kujwayelekile kunguqu ukuthi ngalesi isikhathi amaqembu adinge abadlali abatsha. Akumangalisi, yikho okumele kwenzakale,” kutsho umfakazi oqotho ochatheke ngaloludaba.
Abalandeli beBosso enkundleni yeBarbourfields koBulawayo
Kusenjalo, kwekaMatshobane iHighlanders, uBukhosi “Zakhu” Sibanda usefulathele iqembu, okutsho ukuba ngesizini ezayo uzabe engekho.
IHighlanders imemezele ngeSonto ukuba ayisoke yengeze isivumelwano sayo lomdlali lo ngesizini ezayo.
Simon “Yolo” Munawa
“Iqembu lithanda ukwazisa ukuthi uBukhosi ‘Zakhu’ Sibanda ngeke abe yingxenye yeqembu ngesizini ezayo kulandela ukuvumelana lomdlali,” kutsho umbiko weHighlanders.
Umdlali lo ubeqeda isivumelwano sokudlalela iHighlanders ekupheleni kukaMpalakazi. Wafika eqenjini ngesizini ka-2018.
IHighlanders iphinde yabika ukuba isibize uGillian Nyathi, ukaputeni weBosso90 kuqembu elikhulu. UNyathi, oleminyaka engu-21 yokuzalwa uzaqala ukudlala ngesizini ezayo.
