uMthunywa
YiNtatheli kaMthunywa
ABANYE abaqeqetshi bomdlalo wenguqu bathe abangeni ndawo ngokwenziwe nguStanley Chirambadare.
UChirambadare wetheswa icala lokubhinya omunye umfana amfundisa ibhola kukolitshi lakhe le-Revival Football Academy.
Kumbiko ekhitshwe yinhlanganiso yeZimbabwe Soccer Coaches Association (Zisca) ngoLwesibili emini, abaqeqetshi bomdlalo wenguqu bacetshiswe ukuthi bafunde ukuhlonipha impilo lamalungelo abantwana.
“Thina njengenhlanganiso yeZimbabwe Soccer Coaches Association silesisekelo sombuso esilandelwa ngamalunga ethu. Nxa uChirambadare elecala, inhlanganiso yethu iyazigeza kulokhu,” kutsho umbiko walinhlanganiso.
“Umlandu wethu njengabaqeqetshi yikuthi sidinge ithalenta ebantwaneni, sibakhulise hatshi ukubahlukumeza.
“Amalunga ethu siwafundisa ukuthi ananze amalungelo abantwana. Sikhulekela ukuthi uChirambadare atholakale engela cala.”
I-Zisca ithe abaqeqetshi bayo bamele ukuthuthukisa isizwe kumdlalo wenguqu.
“Singabaqeqetshi abafundisa inguqu, siphila ngalumdlalo. Ukuhlukumeza abantwana kuyasiyangisa. Sikhuthaza amalunga ukuthi abengumzekeliso omuhle emphakathini,” kutsho inhlanganiso yeZisca.
