uMthunywa
Siphathokuhle Ngulube
SALIBONANI bafundi. Ngithemba liqhuba kahle ezifundweni zenu. Nanso lemihloliso isisondele nje bafundi. Kambe siyakunanzelela yini lokho? Zikhona izinkulumo engande ukuzizwa ngalesi isikhathi ezihambelana lomumo wemihloliso.
Abafundi bande ukukhuluma izinkulumo eziveza obala ukuthi lukhona uvadlwana osoluhlupha esifubeni mhlawumbe ngokungalungiseleli kuhle imihloliso. Uthole umuntu eseziduduza nje ngamazwi angasizi ngalutho.
Kuvele obala nje ukuthi sekuyikudinga isiviko sokuthi umuntu angekela ukwenza kuhle athi kungenxa yalokhu lalokhu. Ngike ngalalela abafundi bexoxa nje belibele. Angithi abadala bathi indlebe lisela. Omunye wabafundi uzwakale esithi, “Mina njengenombolo angizihluphi ngazo lonyaka ngoba sasingelambalisi. Abazali bami labo bayakwazi lokho”. Omunye laye wezwakala esithi, “Ah! Mina vele angizihluphi. Angithi abazali bami bayakwazi ukuthi asifundanga, angithi bekuleCovid”.
Yebo-ke umbalisi wenombolo ubengekho. Pho wena wenzeni ngalokho?. Uhle nje wahlala wazitshela ukuthi akula minye imizamo ongayenza? I-Covid yona ibingeyakho wedwa yini? I-Covid ibihlasele izizwe lezizwana. Pho-ke yindaba kabani mfundi? Izinkulumo lezi zingenze ngananzelela ukuthi kulokuyengana kwabafundi okuthile. Okunye njalo nginanzelele ukuthi abafundi babona angathi ukufunda lokhu benzela abazali babo.
Ayisikho lokhu bafundi. Imfundo ngeyenu njalo lingakhulumi izinkulumo zokuziduduza ezingeke zilincede ngalutho. Omunye umfundi uzwakale esithi, “Mina vela angisoke ngiphumelele ngoba angenzanga izifundo lezo ezenziwa ngaphandle kwesikolo ngoba abazali bami bathi abalamali” Hawu bafundi! Kanti othe izifundo zangaphandle kwesikolo yizo eziphumelelisayo ngubani? Ayisikho lokhu bafundi. Okuphumelelisayo yikusebenza nzima umuntu angaziniki ukuthula ngomsebenzi wakhe wesikolo. Amazwi la esiwakhulumayo siziduduza awasoze asincede ngalutho. Siyazibambelela nje siyengana kodwa kusasa impumela ibuya iqonde umuntu oyedwa hatshi iqembu. Asisebenzeni nzima silungiselela imihloliso sime ukudinga isiviko lempumela ingakaphumi.
Asibonaneni ngeviki ezayo.
