uMthunywa
Thokozile Mbedzi
Izimvu zohlobo lwe-Dorpers zilomkambo omuhle njalo umlimi angazitholela inzuzo enhle nxa angazifuya, kutsho abeWholesale Beef.
Ekhuluma lentatheli kaMthunywa esembukisweni weZimbabwe International Trade Fair kumaviki ambalwa edluleyo uMnumzana Piet Jazua Nieuwoudt ongu-farm manager uthe izimvu zilenzuzo ikakhulu umhlobo we-Dorpers.
“Izimvu zohlobo lweDorpers zilomkambo omuhle kakhulu kungakho-ke ngithanda ukukhuthaza abalimi bakuleli ukuthi bazifuye.
“Inengi labafuyileyo kabakuthakazeleli ukufuya izimvu ngoba besesaba ukuthi zilomsebenzi omkhulu ekuzifuyeni.
“Izimvu lezi zifuna ukunakakelwa ngesikhathi zizalwa ikakhulu inkaba yazo ukuze iphole kuhle kungangeni amagcikwane ngakho bangafaka i-betadine.
“Lokhu kwenza zikhule kuhle. Esibayeni sazo ezizeleyo ziyakhethwa zifakwe eceleni ukuze zithole ukunakakela amazinyane kuhle njalo amunye kuhle.
“Ngokunjalo lezilebele ziyanekelwa ukuze nxa zizala zithole ukusizwa masinyane zingalahlekelwa ngamazinyane.
“Umhlobo weDorper muhle ngoba uchithile imizimba yazo okwenza amafutha engabuthani ndawonye, kazibi lamafutha amanengi emzimbeni.
“Izimvu lezi siyazivulela zihambe ukuyakudla emadlelweni kodwa sizikhangela lokuzinakakela.
“Zilomkambo omuhle kakhulu ngoba umlimi angabalakho ukuthengisela amahotela asendaweni ezitshiyeneyo ezifana le-Victoria Falls, Hwange, khonapha koBulawayo lakwezinye indawo elizweni.
“Umhlobo lo ulenyama elohlonzi njalo ethakazelelwa nguzulu, labo abafuna ukuthenga labo siyabathengisela.
“Izimvu lezi uzulu kumele azifuye njengebhizimusi ngoba zilenzuzo emangalisayo,” kuphetha uMnu Nieuwoudt.
