uMthunywa
Brandon Moyo
IQEMBU le-hockey leZimbabwe labesifazane lama-Under 21 liphumelele ukuyadlala kuWorld Cup ngemva kokunqoba kuma-qualifier adlalelwa edolobheni le-Ismailia eGipite.
Iqembu leZimbabwe liqede lingelesibili ngemva kweSouth Africa kumncintiswano obufuna amaqembu amabili kuphela ukuthi afinyelele iWorld Cup. Umncintiswano abadlale kuwo ubizwa kuthiwa yi-Africa Junior Cup.
Iqembu leZimbabwe linqobe imidlalo emibili phakathi kwemithathu abayidlalileyo. Kodwa-ke, iqembu likaBrad Heuer beliqalise lingathi alidlali kakuhle kodwa liphenduke latshintsha ukwenza, lakwazi ukuguqula izinto emidlalweni emibili yokucina.
Kumdlalo wokuqala ngeSonto, iqembu lanqotshwa 3-0 yi South Africa. Kowesibili odade bakuleli baphenduke banqoba iEgypt 4-0.
Iqembu leZimbabwe licine ngokunqoba iKenya nge 7-0. Abadlali abadlale kakuhle babalisa uTinodiwanashe Elijah, Khanyisile Mzizi, Kaylee Sithole loTanyaradzwa Changa. UElijah uhlohle amathathu, uSithole wahlohla amabili, uMzizi loChanga bahlohla amanye.
Iqembu labafana lehlulekile ukuphumelela kweyabo imidlalo ngemva kokuba benqotshwe kabili.
