Izilimo zifuna umhlabathi owakhekileyo

28 May, 2020 - 19:05 0 Views
Izilimo zifuna umhlabathi owakhekileyo

uMthunywa

Joel Ndlovu

ABALIMI sebekhuthazwe ukuba baqhubekele phambili ngokuphendula inhlabathi abahlanyela kiyo izilimo zabo ukwenzela ukuthi ihlale yakhekile njalo lezibungu ezihlala kuleyonhlabathi zife.

Ekhuluma lentatheli kaMthunywa uNkosikazi Ntombizethu Ndlovu oyingcitshi kwezokulima lokufuya uthe ukuphendula umhlabathi kuqakatheke kakhulu kwezokulima ngoba kuyabulala izibungu njalo ukudla okusemoyeni kuyangena enhlabathini kuhlale kuthi nxa sesihlanyelwa isilimo sithole sokulokudla phansi.

“Loba yisikhathi sokutshisa kumbe esomqando kuqakathekile ukuthi abalimi baphendule inhlabathi ngaso sonke isikhathi ukwenzela ukuthi izibungu ezihlasela izilimo ezihlanyelwayo zife.

“Lokhu njalo kwenzelwa ukuthi ukudla okusemoyeni kungene enhlabathini lula, izilimo lazo zingahlanyelwa zithole vele sekulokudla phansi,” kulandisa uNkkz Ndlovu.

Uqhubekele phambili esithi nxa ungaphendulwa umhlabathi umlimi usengafaka umquba wakhe uhlangane lenhlabathi.

“Izilimo zikhula kuhle kakhulu nxa sekulomquba enhlabathini. Umlimi kumele afake umquba olingeneyo okuzavumela ukuthi inhlabathi ibenhle kakhulu okuzenza isilimo esihlanyelwayo sihlabuse nxa sesivuthiwe.

“Okunye okuqakathekileyo yikupha izilimo zakho amanzi aneleyo. Nxa umlimi esehlanyelile isilimo sakhe akumelanga athelele kakhulu ngoba ziyabola intanga njalo kwenza intanga lezo zihlaselwe yimikhuhlane lula,” kusitsho uNkkz Ndlovu.

Uphethe ngokuthi akupheleli ekuphenduleni inhlabathi kuphela, kuqakathekile ukuthi umlimi asebenzise imithi ehleliweyo eyokubulala izibungu lokuncedisa ukubulala imikhuhlane ukwenzela ukuthi athole inzuzo enhle. Ihanyanyisi ingumuthi wokuxotsha izibungu ngakho-ke umlimi angayihlanyela eceleni kwesilimo sakhe ukuze avikele izilimo zakhe.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds