uMthunywa
Wayne Ncube
Abalimi sebekhuthazwe ukuthi balime izihlahla ngoba zilenzuzo kanye lomkambo omkhulu endaweni ezehlukeneyo.
Inkampani ebona ngezenhlanyelo i-SeedCo ixwayise abalimi ukuthi bacabangisise ngokulima izihlahla ezinengi zokuthengisa ngoba zilakho ukubenzela imali enengi ngoba umkambo wakhona ugoqela abalimi bezithelo kanye lozulu ozifunela izihlahla.
Ekhuluma lentatheli uMnumzana Jabulani Ncube oyingcitshi kwezenhlanyelo kunkampani le ucebise abalimi ukuba kabahlanyele izihlahla ezehlukeneyo bezithengisa ukuze benze imali.
“Imali ingenziwa ngendlela ezinengi nxa umuntu elima ngakho khathesi sesibone ukuthi abalimi kabandisanga ukulima izihlahla kuyindlela yokuzithengisa ngakho lokhu kuvule umkambo omkhulu wokwenza imali.
“Abalimi abalima izithelo yibo abandise ukuthenga izihlahla zezithelo lapho ezabo sezigugile, lokhu abantu kubenza badinge izihlahla ezithengiswayo,” kuchaza uMnu Ncube.
Abalimi bakhuthazwe ukuthi badinge ulwazi lwezihlahla ezehlukeneyo kusukela kwezezithelo kusiya kwezokufaka emagumeni.
“Kulezihlahla zezithelo besekusiba lezihlahla zokucecisa. Umkambo wazo wehlukene njalo ubanzi, izihlahla zezithelo zandise ukuthengwa ngobunengi ngabalimi kanye lezakhamizi ezivula amaguma azo, kuzokuthi izihlahla zokucecisa zithengwa ngobuhle bazo ngoba izikhathi ezinengi zithengwa ngamankampani alendawo zokuhlala lokuzithokozisa,” kulandisa uMnu Ncube.
Uphethe ngokuxwayisa abalimi ukuthi bengathatha isinqumo sokulima izihlahla kabadinge ulwazi lokunakekela izihlahla lezi ukuze inzuzo layo iphindisele ibenengi.
