uMthunywa
Thokozile Mbedzi
KULEZIGELEKEQE ezingene kwenye inkampani eseBelmont koBulawayo ngoMvulo zatshontsha imali edlula iUS$16 000 kunye le R30 000.
Kubikwa izigelekeqe lezi zingene enkampanini le ngophahla zatshontsha imali engange US$16 552, iR30 120 kunye leZWL$481.
Ekhuluma lentatheli kaMthunywa uEmmanuel Moyo uthe wathi esedlula enkampanini le wezwa izisebenzi zibabaza ukuthi amasela angene atshontsha kodwa onogada belindile.
“Izisebenzi lezi bezingayivali imilomo zibuzana ukuba kwenzakale njani ukuthi izigangi lezi zingene enkampanini. Zikhwele ephahleni zabhoboza andubana zeqele phakathi zatshontsha zingabonakalanga kodwa kulonogada olindileyo egedini,” kulandisa uMnu Moyo.
Isikhulumi samapholisa ulnspector Abednico Ncube ebuzwa ngodaba lolu uthe bachwayisisa ngodaba lapho amasela angene kwenye inkampani eseBelmont batshontsha imali.
uInspector Abednico Ncube
“Samukele umbiko wamasela angene enkampanini yePolyfoil eseBelmont ngophahla ngemva kokusika amazenge kunye le-ceiling.
“Sebephakathi baquma ikhiye ukuze benelise ukuthatha imali ebiku-cash box. Bathatha imali engange US$5 676 ku-cash box. Baqhubekela njalo ehofisini kaMphathi wezimali lapho abasebenzisa ikhiye efananayo leyasetshenziswayo ekuvuleni bathatha imali engange US$10 8760, ZWL$481 le-R3 000. Imali yonke isihlangene yaba yiUS$16 643, R30 120 leZWL$481,” kutsho uInsp Ncube.
Isikhulumi samapholisa siqhubekele phambili saxwayisa abamabhizimusi ukuthi bangagcini imali enengi emankampanini.
“Njengamapholisa sithanda ukuxwayisa osomabhizimisi labamakampani ukuba bengabogcina imali ezinengi emahofisini abo.
“Okwesibili loba kulabantu abafundele imisebenzi kumele badinge njalo amanye amaqhinga okugcina endaweni zabo kuphephile okunjengama-alarm lama CCTV cameras.
U lnsp Ncube uphethe ngokucela labo abangabe belolwazi lokuthi ngobani abenze lokhu babikele amapholisa aseduzane labo.
