uMthunywa
Innocent Kurira
INHLANGANISO ephethe umdlalo we-basketball kuleli, eyeBasketball Union of Zimbabwe (BUZ) isibike ukuba izaqinela kuhlelo lwayo lokufundisa abaqeqetshi labonompembe kundawo ezingaphandle kwamadolobho amakhulu.
Lokhu kuvezwe ngumongameli walinhlanganiso uJoe Mujuru lapho agcizelele ukuba bazafinyelela kuzo zonke indawo lapho okudlalwa khona i-basketball ngenhloso yokuthuthukisa izinga lomdlalo ezigabeni.
Ngeviki edluleyo ingcitshi zokuqeqetsha lezazi zomthetho womdlalo zibuthanise onompembe labaqeqetshi esabelweni seMatabeleland South kuqhutshwa loluhlelo.
UMujuru uthe ngokwenza lokhu, umdlalo wabo uzamemetheka njalo kuzakuba lula ukuthi kulolongwe abadlali abalolwazi.
“Isizini yethu isavaliwe okwakhathesi, okutsho ukuba amaqembu akukhefu. Ngakho-ke, njengenhlanganiso ye-Basketball Union of Zimbabwe, sikubone kufanele ukuthi siqhube uhlelo lwethu lokuphakamisa abaqeqetshi labonompembe kundawo ezikhatshana lamadolobho.
Ngokunjalo ngeviki edluleyo siqale ngokuvakatshela eGwanda, esabelweni seMatabeleland South. Inhloso yethu yikuthi sandise ulwazi ukuze umdlalo ukhule lokuthi abasakhulayo abakulumdlalo bathole imfundiso yoqobo,” kutsho uMujuru.
UMujuru uthe ngokwenza lokhu, bazanikeza abaqeqetshi ithuba lokuthi bazivulele amathuba okuthola lolulwazi kumakhosi atholwa kwamanye amazwe. Uthe abaqeqetshi abazakuba lesifiso sokwengeza ulwazi lwabo bazaqalisa ukungena emakilasini e-Instructors’ course ngenyanga kaMpandula.
“Sifuna ukuhamba kuzabelo zonke, sifundisa abaqeqetshi labonompembe bethu. Kasifuni ukutshiya umuntu emuva kumbe ukuvalela abantu. Wonke umuntu oqeqetsha i-basketball kumele athole ulwazi,” nguMujuru lo.
Uthe kusiyaphambili, kuzaqhutshwa lenhlelo zokufundisa ngomhlobo womdlalo we-basketball obizwa ngokuthi yi-3X3.
