uMthunywa
YiNtatheli kaMthunywa
INHLANGANISO yeZimbabwe Football Associations isibabaze uWalter Magaya, ongumphorofethi yathi ulethe ukukhanya kunguqu yakuleli.
“UMagaya yinkanyezi, kafani labanye abaxokozela kundaba zenguqu,” kutsho iZifa kuliviki.
IZifa ikhweze isithunzi salumphorofethi kulandela ukuncediswa kwamantombazana eqembu lamaMighty Warriors ukuthi athole indawo yokulala ewoteleni yakhe.
UMagaya lo okhokhela ibandla lePHD Ministries useke wasolwa ngenyathelo lakhe lokuhlala efuna ukusiza iZifa, ikakhulu kusiphatho samaqembu amakhulu.
Unikeze amaMighty Warriors indawo yokulala anduba amantombazana ayengqikilana leZambia kumdlalo womkhankaso wendebe yenkezo yenguqu yabomama.
Umusa kaMagaya kubikwa uzasiza kakhulu inhlanganiso yeZifa yona ethwele luklubhu ngezikwelede lokwehluleka ukulungiselela amaqembu esizwe.
NgoLwesibili emini iwofisini yezokuxhumana kunhlanganiso yeZifa ikhiphe umbiko isithi uMagaya yinkanyezi.
Isikhulumi seZifa uMnumzana Xolisani Gwesela uthe uMagaya yindoda ethembekileyo.
“Inhlanganiso yeZifa ithanda ukubonga umphorofethi uMagaya lebandla lePHD Ministries ngokuvuma isicelo sethu sokuncedisa ama-Mighty Warriors ngendawo yokuhlala bekhangelane lokuya eZambia lapho abazahlangana leShepolopolo emidlalweni yeWomen Olympic qualifier,” kutsho uGwesela.
“Umphorofethi uyathembeka njalo ungomunye wabantu abathanda umdlalo wenguqu, yikho kuqakathekile ukuthi simbabaze. Inceku yenkosi iyisibonelo esihle ekuhlanganiseni amakhanda leZifa ukuze umdlalo wenguqu uqhubekele phambili.”
Uqhubeke phambili wathi: “Inhlanganiso yeZifa ithanda ukubiza njalo abanye abantu ukuthi bexhase bethuthukise umdlalo wenguqu belandela lokhu okwenziwe ngumphorofethi uMagaya ekuxhaseni umdlalo wenguqu lokuthuthukisa umntwana oyinkazana.”
Uthe bona njengenhlanganiso bafisela uMagaya okuhle.
“Siyabonga mphorofethi Magaya, siyazehlisa phambi kwakho ngesenzo esihle,” kuphetha uGwesela.
