uMthunywa
Khanyile Ndebele
INHLANGANISO yeAgritex iveze izibungwana ezihlasela isilimo samatamatisi lendlela ezingaliswa ngayo ukuze simile kuhle abalimi benelise ukuthola inzuzo.
UNkosikazi Stella Rombe ongumlimisi koBulawayo ngaphansi kwenhlanganiso ye-Agritex uthe amatamatisi andise ukuhlaselwa yizibungwana ezibalisa ama-hornworms lama-spider mites.
Uthe umlimi angenelisa ukunanzelela izibungwana lezi masinya azikhiphe ensimini yakhe umlimi ngeke alahlekelwe yisivuno sakhe.
“Ama-hornworms yizibungwana ezilobuqili, ziyizibungu ezinkulu eziluhlaza ezingaba yi-2cm kusiya ku-3cm ubude. Zilempondo ezincane ekhanda kanye lemizimba egobileyo. Zilombala ofanana xathu lengatsha zamatamatisi.
Ihornworm
“Besekusithi intwala zamatamatisi zona zincane kakhulu kodwa umlimi ulakho ukuzibona ngomonakalo eziwutshiyayo emahlamvini,” kutsho uNkkz Rombe.
Uqhubekele phambili waveza ububi obudalwa yizibungwana lezi kuzilimo zamatamatisi abalimi okufanele bawulimuke.
“Ama-hornworms ayazifihla ngenxa yombala wawo ofanana lengatsha zamatamatisi okwenza kubenzima ukuzinanzelela. Yizibungwana eziphuma ebusuku zidle wonke amahlamvu esilimo, beseziqhubeka ziphambanise esinye isilimo esilandelayo.
iMarigold
“Kukanti intwala zamatamatisi ziyaluma eduze logatsha lamahlamvu, besezibhokoza amahlamvu ukuze zimunye umsobho. Njengama-hormworms lazo intwala ziyaphambanisa ukwakhiwa kwamahlamvu amatamatisi.
Uphethe ngokuveza imithi abalimi abangayisebenzisa ukulwisa izibungwana lezi ukuze izilimo zabo zimile kuhle benelise ukuzithengisa bethole inzuzo.
“Abalimi balendlela ezimbili zokuliswa izibungwana lezi. Bangasebenzisa imithi loba indlela yemvelo. Umithi umlimi angawusebenzisa yi-Bacillus thuringiensis besekusithi indlela yemvelo yikuhlanyela isilimo se-Marigold ngoba umnuko waso uyaxotsha izibungwana lezi.
“Kukanti ukulwisa intwala zamatamatisi abalimi abangakusebenzisa ukuliswa izibungwana ama-spidermites yi-neem oil,” kutsho uNkszn Rombe.
