uMthunywa
Siqhubeka ngokuhlolisisa izibongo zamakhosi sikhangele kakhulu ukuthethela. Ngeviki edlulileyo besixoxa ngokuthethela ukuthi khona nje kuvele kuyini njalo kuqhutshwa njani.
Amakhosi ke lawo ayephatheka kwezokuthethela, yiyo ke eyayikhokhela abosendo loba nje isizwe sayo jikelele. Kuthiwa ke ngesikhathi senxwala inkosi yiyo eyayikhuluma laba phansi, ibonga kakhulu abaphansi ngokuvikelwa kwesizwe kanye nje losendo lonke jikelele kuzikhathi ababedlule kuzo.
Kanye lomumo othile ababathe bahlangana lawo. Ngokukholelwa kwamagama kuzo njalo izibongo zokuthethela lezi ezazisaziwa njengezibongo ezingajayelekanga, zibizwa ngezibongo ezizilayo, kuthiwa ke kwakusithi ngemva kokuhaywa kwezibongo lezi kwakusehla isehlakalo esingajayelekanga.
Yikho nje zazingamane nje zihaywe yiloba ngubani, zazizila.
Kukhona njalo ukuthethela okwehlukileyo kulokhu okuqhutshwa ngamakhosi eqhuba izibongo zawo. Kulokuthethela kubongoma kanye lobunyanga.
Inyanga ke yona kuthiwa ihlahlula ngamathambo, lapha ke iyabe itshaya amathambo ukuze ithintane labaphansi kuvezwe okuthile mhlawumbe okuyabe kungasahambi kuhle, amakhosi ke wona akhulumisana labaphansi ngokuhaya izibongo.
Isangoma ke sona siyabhula kumbe njalo ngelinye igama elijayelekileyo kuthiwa siyabhula.
Amakhosi ke wona ayengadingi ngitsho izigojwana ezingasetshenziswa kumbe amathambo athile angasetshenziswa ukukhulumisana labaphansi kwakusetshenziswa izibongo qha.
