uMthunywa
Nkosilathi Sibanda
UZENZO Moyo kafani labanye abathi bengatshiya ukudlala inguqu, bakhalale impilo zabo.
UMoyo, usenelise ukuthi aphakamise umdlalo wenguqu ngokuba yinkokheli kunhlelo zomdlalo. Kumaviki adluleyo, usungule umqhudelwano odibanise amaqembu enguqu adlalelwa ngamapholisa eZimbabwe Republic Police koBulawayo.
Umncintiswano lo, obizwa ngokuthi yi-Zenzo Moyo Legacy Cup, ufike emaphethelweni ngoLwesihlanu ngeviki edluleyo enkundleni yeBulawayo Chiefs Village.
Inhloso kaMoyo yokudibanisa amapholisa kumdlalo wenguqu, ivele ekuthini ufuna ukuphakamisa umsebenzi wamapholisa aphinde anikeze umzekeliso wokuthi amapholisa kumele abongwe ngalokhu akwenza emphakathini.
UMoyo, odume ngelithi “Zemura”, ubengowokuqala kulabo abadla ubhedu kunguqu ukwelula isandla kumaqembu amapholisa koBulawayo.
Kube ngumqhudelwano odonse uzhizhi lwabantu abangene eBulawayo Chiefs Village befuna ukubona ukuthi amapholisa esizwe ayalazi na ibhola.
Ekhuluma lephephandaba likazulu, uMoyo ubike ukuba umbono wakhe ngowokuthi amapholisa akhuthalele ezemidlalo.
“Ukuqakatheka komsebenzi wamapholisa empilweni zethu kumele sikunanzelele. Kube ngumbono wami ukuthi ngisungule iZenzo Moyo Legacy Cup ngokudlalisa amaqembu amapholisa koBulawayo njengendlela yokubabonga,” kutsho uMoyo.
“Njengomphakathi kumele siwuthakazelele umsebenzi wamapholisa. Ngokwenza kanje, siwakhuthaza ukuthi asebenze ngokuzikhandla. Ukuphatheka kumncintiswano enjengale, sibanikeza ithuba lokuqinisa imzimba yabo lokuthi bakhuthalele impilakahle ngasikhathi sinye besebenzise ithalenta abalalo kunguqu.”
UMoyo, owazakhela ibizo edlala kuqembu leHighlanders uthe umqhudelwano wamapholisa lo uzaqhubeka ngomnyaka ozayo lapho ahlose ukuthi ubemkhulu.
“Umdlalo wethu uzabe ukhona ngomnyaka ozayo. Ngifuna ubemkhulu ukwedlula lokhu esikubonayo.
“Inkuthazo engilayo ngeyokuthi izakhamizi zakoBulawayo, labosomabhizimusi abaphakame besekele amapholisa ukuze aqhubeke ngokwenza umsebenzi wawo.”
UZenzo Moyo exhawula abadlali
Amapholisa akoBulawayo abonge engaqedi ngokusekelwa nguMoyo kwezemidlalo.
Isikhulu samapholisa esabelweni sakoBulawayo, uCommissioner Patson Nyabadza obengumhlonitshwa omkhulu uthe kuyinkuthaza enkulu ukubona umdlali wenguqu esekela umsebenzi wamapholisa.
“Kuhle ukuthi umphakathi usekele umsebenzi wamapholisa ngelindlela,” kutsho uComm Nyabadza.
“Ngithanda ukubonga imizamo kaZenzo Moyo yokwakha ubudlelwano lamapholisa. Kuyajabulisa futhi ukubona umuntu wezemidlalo esekela imidlalo yamapholisa.”
Kusenjalo, kube yikudla kwamehlo amapholisa esekhiphe amajambo agqoka impahla yenguqu elwela inkezo kaZenzo ngoLwesihlanu.
Iqembu lamapholisa eNtumbane Police Station aqumbe phansi iTshabalala Police Station nge 3-0 kumdlalo okhanye uhlabusa inengi labathandi bebhola lenyawo.
Kulumdlalo kubuse uWitness Siamalambo loFrank Shumba abeNtumbane abagaxe amabhola amabili emambuleni ngesigaba sesibili somdlalo.
Amapholisa eNtumbane adlale awubamba umdlalo, encitsha iTshabalala ngitsho ithuba elilodwa. Ukuhlasela kweNtumbane kudale ukuthi kube lombekwa egedini leTshabalala umdlalo usubanga emaphathelweni. Umdlali weNtumbambe uDavis Magada kazange ayangise, uhlohle umvema webhola, kwahle kwaba yikuphela kweTshabalala.
Ababukeli basuke bakhohlwa ukuthi kudlala abantu abadala ngoba ithalenta lobungcitshi obebukhona, bekufana lokubukela inguqu yaphezulu.
Omunye umbukeli okhulume lephephandaba likazulu, uMusa Masuku, uthe unanzelele ukuba amanye amapholisa kwakumele azimisele ukudlala kumaqembu ePremier Soccer League.
“Abanye ngabe baqinisela bazama ukudlala kuPremier League ngoba bayalazi ibhola. Eqinisweni bayedlula abafana laba abakumaqembu amakhulu,” kutsho uMasuku obike ukuba ungumsekeli weqembu lamapholisa elibizwa ngokuthi yi-Traffic.
Ngokufinyelela kumdlalo wokucina, i-Ntumbane leTshabalala zithole amakhithi okudlala athengwe nguMoyo. Kumdlalo wokulwela inombolo yesibili, amapholisa enkambeni yeMzilikazi adle iTraffic ngebhola elilodwa. Zombili zibuyele ekhaya ziphethe isipho samabhola amabili.
