uMthunywa
Intatheli kaMthunywa
ABADLALI beHighlanders lokhe bengafuni ukulolonga ngoba abakaholi, okungenza banqotshwe lula kunkezo yeZNA Charity ngempelaviki enkundleni yeBarbourfields.
IHighlanders idibaniswe leChicken Inn kulumdlalo oqhutshelwa ukudinga imali yokwakha isikolo eMbalabala. Iqembu elizanqoba lizaphiwa i$10 000.
Loba kunzima enkambeni yeBosso, umgcinisihlalo waleliqembu uKenneth Mhlophe uthembise ukuthi ababukeli bazajabula. Kwehlule ukuthi uMhlophe athambise inhliziyo zabadlali bakhe kuliviki esencenge waze wahawula umuntu omdala echasisa ngemali zeholo. Abadlali baleliqembu sebelamaviki amabili belolonga ngokuncengwa.
IChicken Inn ilethuba lokuthi idlule phezulu komakhelwane wayo njengoba ivela kweleMalawi lapho ebidlala kumqhudelwano weNyasa Big Four Team Bonanza. Akubuzwa muntu ukuthi iChicken Inn ilabadlali abalomfutho ukwedlula iBosso njalo lokulungiselela kwayo kusezingeni eliphezulu.
Kuzindaba ezimnandi ukuthi umdlalo lo useBarbourfields ngoba kade abathandi benguqu bacina ukubekela umdlalo omkhulu odibanisa amaqembu akoBulawayo.
Kumdlalo lo kuqalwa phansi ngoba kulisizini kulabadlali abatsha kumaqembu la njalo labaqeqetshi babika ukuthi sebeyinuka inkezo yamabutho.
Abaqoqi benkezo le bathembisa ukuthi ababukeli bomdlalo bazakholisa ukudla kwamehlo. Ekhuluma loMthunywa uLieutenant Colonel Joe Chitungo uthe lumdlalo usungoMgqibelo loba nje ubuhlelelwe ngeSonto njalo konke sekulungisiwe ukuthi amaqembu adibane eMagumeni.
“Umdlalo ukhona ngempelaviki. Kubo bonke abathanda amaqembu la sithi wozani ngobunengi benu. Sizahlangana eBarbourfields,” kutsho uLt Chitungo.
Inkezo le izakuba ngeyakuqala andubana kuvulwe iligi yePSL ekupheleni kwenyanga.
Umqeqetshi weChicken Inn uJoseph Antipas uthe ulinde ukuyithwala inkezo.
“Kumele sibambe ngamandla kulumdlalo. IHighlanders siyayihlonipha kodwa asivumi ukuthi isinqobe.”
