uMthunywa
Nkosilathi Sibanda
BALUSIZI abomdlalo weVolleyball esabelweni seMatabeleland South ngokuvalelwa yiCovid-19 ukuthi baqhubekele phambili bencintisa, osekwenze bacabanga ukuthi kuzakubanzima ukuncintisa kulisizini.
Isizini yalonyaka bekumele ivule ngenyanga kaMbimbitho kodwa ngenxa yokuza koncindezelo lwe-Lockdown olwaqala mhlaka 30 ngenyanga leyo, akuzange kuphumelele ukuya enkundleni.
Okwamanje akwaziwa ukuthi imidlalo izaqhubeka nini, ikakhulu eMat South lapho lumdlalo ongela ngitsho usekelo lwemali. Amathimu adlala kulindawo akhipha imali zawo ukuze enelise ukugcwalisisa imncintiswano.
Kungumbono wabadlali labacubunguli bomdlalo kuleli ukuthi ukuwa kweVolleyball eMat South kubangelwe yibuvila njalo ukuza kweCovid-19 kwenze kwabalula ukuthi inkokheli zithole ezingacatsha ngakho.
“Umdlalo wevolleyball awusekho lapha kithi eMatabeleland South. Siyavuma ukuthi iCovid-19 le eyabuyayo ivale imidlalo kodwa lakudala bekukhanya ukuthi akusela mdlalo oqinileyo. Ukukhuluma ngeCovid-19 yikuvala nje,” kutsho umfakazi ongomunye wabaqeqetshi bevolleyball kuleli.
Isabelo seMat South sasidume ngokukhulisa ithalenta kubadlali abaphuma kumaqembu abalisa iFilabusi, Mzingwane, lasePlumtree.
Kubikwa ukungena kwenkokheli eziphethe intambo okwakhathesi kwabayisiqalo sokuwa kwesisindo salumdlalo. Inkokheli lezi kuthiwa zathembisa ukumemethekisa umdlalo kuzigaba eziyisikhombisa zaseMat South kodwa akuzange kwenzeke. Izigaba lezizigoqela i Gwanda South, Gwanda North, Bulilima, Mangwe, Umzingwane, Insiza le-Beitbridge.
Kodwa umgcinisihlalo weVolleyball yeMatabeleland South, uMorlet Mathema uthe umdlalo usasekhona njalo bazazama ukuthi nxa kuphela iLockdown yeCovid-19, imidlalo iqhubeke njengokuhlela kwabo.
“Umdlalo ukhona. Kwakumele siqalise ekupheleni kukaMbimbitho, ngemva kokwenza imncintiswano yokuvula isizini. Kwasuka kwavela iLockdown, yikho singaqhubekelanga phambili,” kutsho uMathema.
Uthe imizamo yabo yokumemethekisa iVolleyball isegcekeni nanko phela banxusa ukuthi kubunjwe amaqembu endaweni yabo.
“Amaqembu asetshengisele ukuthi akhwabitha ukuba yingxenye abalisa iGwanda State University, ZRP, PPC Colleen Bawn, Jessie Mine, Wolves, Beitbridge Eagles le-Wizzards.”
