uMthunywa
Ethel Ncube
ZISELE zibambe owangaphansi izakhamizi zeMathambo eZhombe ngemva kokubanjwa kwezalukazi ezintathu zikhasa ngamadolo engcwabeni sokungani zinamathele, uMthunywa ukuzwile lokhu.
Isiga lesi senzakale ngeviki ephelileyo lapho izalukazi ezibalisa ugogo uNaPromise, uMaNcube wakoMbiba kanye lomunye okungasatholakalanga igama lakhe abatholakale engcwabeni lomuntu obelosuku olulodwa engcwatshiwe bekhasa ngamadolo besehluleka ukusuka, baze batshaywa ngoswazi olugcotshwe umuthi.
Intatheli ixhumane lesinye isakhamuzi sakule indawo uNkosazana Miniyomusa Moyo oveze ukuba lindaba wayizwa.
“Kuliqiniso sibili ukuthi kulezalukazi ezintathu ezatholakala engcwabeni lomunye ugogo owayesanda kubekwa zikhasa ngamadolo njalo zisehluleka ukusuka kulo.
“Kuthiwa babethi bangabuzwa ukuthi badingani engcwabeni leli babengaphenduli njalo abantu bathi besithi kabasuke behluleka ukusukuma bacina sebetshaywa ngoswazi olulomuthi yikho ukuthi benelise ukusuka,” kubika uNkszn Moyo.
UMthunywa uphinde wakhuluma lomunye wezihlobo zikagogo uMaNcube owatholakala laye ekhasa engcwabeni, ongumzukulu ongathandanga ukuveza igama lakhe ovumileyo ukuba ugogo wakhe watholakala emathuneni.
“Mina ngabuza ubaba lami sengibone kumakhalekhukhwini umlayezo wokuthi ugogo lezinye izalukazi ezimbili batholakale ethuneni lomunye ugogo obesanda kubekwa wavuma kodwa wathi ngingakhulumi kakhulu ngoba abantu bazaxabana lami.
“Izalukazi lezi kuthiwa zazimile engcwabeni zibhunyumunyu zigqoke amasudu okuzalwa zasuswa ngomuthi sezitshaywa kodwa ithuna lalingakaphandwa,” kutsho umzukulu lo.
Ikhuluma lentatheli induna uMalisa iveze ukuba udaba lolu alukafiki ngokuqondileyo kuye.
“Umuntu engimtshayele ucingo uvumile ukuthi kulezalukazi ezatholakala zisethuneni ngakho ngisazama ukudinga usobhuku wakuleyondawo ukuze ngizwisise kuhle ukuthi kuhamba njani,” kuphetha induna uMalisa.
