Nkosilathi Sibanda
UMQEQETSHI weFC Platinum uNorman Mapeza ubike ukuba kuyo yonke imidlalo ebikhona kulisizini, akula ozayedlula owangeSonto mhla iqembu lakhe lidibene leHighlanders eBarbourfields.
Ubukhulu bomdlalo lo buzwakala lasezitaladeni zakoBulawayo lapho abalandeli asebeqede iviki lonke bekhuluma ngawo. UMapeza, ekhuluma lentatheli yephephandaba likazulu uthe uhlose ukuphuma lemiklomelo yonke. Ukuzethemba kwalumqeqetshi kuvela ekuthini sekucacile ukuba iFC Platinum isiyintshantshu yeligi yenkezo yeCastle Lager.
“Siwukhangelele lumdlalo. Ngumdlalo omkhulu esihlose ukuwunqoba,” kutsho umqeqetshi lo andubana abike ukuba usegijimela ukuyalolonga iqembu lakhe ngoLwesithathu emini.
IFC Platinum iphethe imiklomelo engu-61, iBosso ikunombolo yesine imumethe imiklomelo engu-45. Ngendlela amaqembu womabili adlala ngayo, izazi labacubunguli bomdlalo babika ukuba umdlalo unganqotshwa ngabafana bakaMapeza.
Amathimu womabili kuyaziwa ukuthi ayizitha enkundleni ngakho kukhangelelwe lokuthi abadlali beHighlanders basukumise abalandeli babo ngokudlala ngohlonzi..