Thokozile Mbedzi
KULEZAKHAMIZI zeMawena eTriangle ezitshaye isela lafa ngemva kokuba litshontshele elinye inina ngeviki ephelileyo.
Kubikwa uMncedisi Sitheni Moyo oleminyka engu-26 utshontshele omunye umama isikhwama semali ebesile US$23 le 40 rand, wasuka wabaleka.
Inina elitshontshelweyo kubikwa lisele lihlaba umkhosi okwenze omakhelwane bagijima besiyalisiza.
Inina elitshontshelweyo libikele omakhelwane ukuba litshontshelwe ngumuntu onjani okwenze bagijima baya endaweni yamabhizimusi eShamva Business Centre bafika bahle bambamba uMncedisi, bamthola elemali yenina ayelitshontshele.
Izakhamizi kubikwa zambopha zaqala ukumtshaya zitshintshana. Sezimtshaye kakhulu, zananzelela ukuba wayesephefumula nzima, zamthwala zayamtshiya eZwemombe Business Centre.
Kubikwa izakhamizi zamtshiya esesimeni esibi, efuthelwa, kwaze kwafika elinye inina elambuza ukuba kwenzakaleni walandisa konke kodwa watshona khonapho.
Inina leli labikela amapholisa latsho konke elalikutshelwe ngumuyi ngokwakwenzakele, okwenza amapholisa alonda abantu ababembulele kwacina kubotshwa uClayton Mudzingwa labanye bakhe, ngemva kwelanga elilodwa efile.
Isikhulumi samapholisa esabelweni seMasvingo, uAssistant lnspector uMasauso Patinyu uthe uzulu kaxazulule inkinga ngesizotha hatshi ukwenza lokhu ngodlakela.
“Uzulu lapho nxa kusuke kwaba lengxabano, kaxazulule inkinga ngesizotha ukuze singalahlekelwa yimpilo mahlayana njengalokhu.
“Abasolwa bahle babotshwa bonke njalo bancedisa amapholisa ukuphenyisisa ngaloludaba,” kuphetha uAsst Ins Patinyu.
