Uncategorized

Izakhamizi zibambe amasela entambo zamagetsi

06 Jun, 2024 - 00:06 0 Views
Izakhamizi zibambe amasela entambo zamagetsi Intambo zamagetsi ezintshontshiweyo

uMthunywa

Langelihle Moyo

KULAMADODA amabili edolobheni lako-Bulawayo eSizinda asezandleni zamapholisa, abotshelwe ukutshontsha intambo zamagetsi.

Kubikwa uEphraim Mbewe oleminyaka yokuzalwa engu-40 loLeeroy Manyora oleminyaka yokuzalwa engu-27 abe-Sizinda, babonakala emini ilanga libalele ngoMgqibelo eHillside bebulala ama-street lights bekhupha intambo ezihambisa umlilo emalayithini. 

Kuvezwe ukuba ngemva kokuba izakhamizi sezibone amadoda la amabili esenza lokhu, zabahlasela ngemibuzo, okwacina kusenza ukuthi amadoda la abaleke kodwa-ke  ekubalekeni kwawo, izakhamizi zabaxotshanisa zenelisa ukubamba uLeeroy zamusa enkambeni yamapholisa eHillside. 

Intatheli kaMthunywa ibuye yezwa ukuthi, ngemva kokuba uLeeroy sebotshiwe, wafika emapholiseni wavuma icala lakhe lomngane wakhe. Ngakho-ke amapholisa  acina esenelisa ukubopha uEphraim.

Isikhulumi samapholisa koBulawayo uInspector Abednico Ncube uthe uthanda ukubonga umphakathi ngokusebenzisana ndawonye lamapholisa ukulwiswana lobugebengu.

“Ngithanda ukudlulisa ukubonga emphakathini ngokubambana elwisa amasela. Ngithanda ukukhuthaza njalo ukuthi asenzeni ngokufanayo lakwamanye amalokitshi nxa sivelelwa yizehlakalo ezinje,” kuphetha uNcube.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds