Ethel Ncube
INDUNA yePlumtree uKandana ebhubhe kuyonale iviki izafihlwa ngoMgqibelo emzini wayo.
Induna ikhothame iseleminyaka engu-72 yokuzalwa ngemva kokugula okwesikhatshana esibhedlela sePlumtree, yedlula emhlabeni. Itshiye umama labantwana ababili kanye labazukulu abathathu.
Ekhuluma lentatheli, induna uNyangazonke uveze ukuba induna uKandana ibingumuntu olungileyo.
“Silahlekelwe kakhulu njengabantu beMatebeleland South. Ubaba uKandana ubengumthombo wolwazi besibuza kuye okunye esingakwaziyo.
Induna uKandana
“Ubemdala, kungakho-ke besihamba sisiyabuza kuye okunengi okuphathelane lamasiko. Ubesazi ukucebisa ngendlela emangalisayo kungakho sisithi silahlekelwe ngempela.
“Sizwa ubuhlungu kakhulu ngoba amakhosi lokhu esiya edlula. Akula esingakwenza ngoba kuyindlela yethu sonke kodwa kubuhlungu. Sikhala ndawonye lesigaba sikababa uKandana kanye lemuli yakhe,” kubika induna uNyangazonke.
Intatheli ixhumane loDistrict Administrator wePlumtree, uMnumzana Onesimo Zogara oveze ukuba induna izafihlwa ngoMgqibelo.
“Induna uKandana izafihlwa ngoMgqibelo mhlaka 7 Mpandula emzini wayo. Umzimba uzalala ngekhaya ngoLwesihlanu, kuthi ke umsebezi uqale ekuseni ngoMgqibelo, kulapho ke induna ezafihlwa khona,” kubika uMnu Zogara.
