Sikhumbuzo Moyo
IQEMBU leHighlanders lizadlala imidlalo emine yokuvula imidlalo yeCastle Lager Premier Soccer League isebenzisa ikhithi yayo yesizini ka2022 ngoba eyalonyaka kayikafiki.
IBosso ithe lokhu kube phezulu kwamandla ayo.
Kumbiko wayo, iHighlanders ithe ilinde ukuba ikhithi entsha ifike koBulawayo kusiya fika inyanga kaMabasa.
“Sithanda ukwazisa abalandeli lalabo esisebenzisana labo ukuthi ukukhitshwa kwekhithi yesizini ka-2023 kuphazamisekile ngenxa yezizatho eziphezulu kwamandla ethu. Abasithungela ikhithi bahlangane lempazamo thile asebeyiqondisile kodwa angeke besenelisa ukuyithumela ngesikhathi.
“Lokhu kutsho ukuthi iqembu lethu lizadlala imidlalo yokuqala emine yeligi isebenzisa ikhithi endala njengoba silindele ukuthi izafika phakathi kukaMabasa,” kutsho umbiko ovela eqenjini.
IBosso iphakathi kohlelo lokuxhaswa yinkampani ye-OTB kumphala zomdlalo, okweminyaka emithathu ngemali engange-US$300 000.