uMthunywa
Ethel Ncube
KULENTOMBI esakhulayo yeSigodini ehlabela umculo we-Afro eza ngomfutho nanko idlalade elethule ekupheleni komnyaka ophelileyo lilokhu litshisa endaweni ezinengi.
UTalent Mhlanga oqale ukuhlabela ngomnyaka ka2022 ulamadlalade amabili kunye lama-single tracks amathathu.
UMthunywa uxhumane loMhlanga oveze ukuthi udinga ukuxhaswa kumculo wakhe.
“Ngaqala ukuhlabela ngomnyaka ka2020 lapho engakhipha idlalade lami lokuqala elilengoma eziyisificaminwe mibili ezibalisa ethi: Kuwe bhudi, Lingehlulekile, Ndinotya, Ezekiya, Ngizwe, Ngibuye lephepha lami kukanti kudlalade lami lakumnyaka ophelileyo lilengoma ezithi: Ngaphunywa lidlozi, Ngeke ngibulale umuntu, Ngikhale ngokufa, Ntshintsha amagiya, Kulendaba, Kunini ngilindile.
“Kukanti ama-single ngilathi Uzokola lonyoko, Mhofu lethi Khuza usbale. Ingoma lezi zithandwa ngabanengi.
“Ngidinga abangangixhasa ekuhlabeleni ukuze umculo wami uqhubekele phambili ukuze ngiqhubeke ngitholisa abalandeli ingoma abazithandayo,” nguMhlanga lowo.
Uthe ukuze isipho sokuhlabelela siphume kuhle kudinga ukuthi umhlabeleli athi nxa ehlabela abalandeli bona bamsekele ukuze abe lentshukuntshu yokwenza ngcono.
“Ukuhlabela yisipho okumele sihlakulelwe ngokukhuselwa ngabalandeli labanye abahlabeleli. Nxa uhlabela kudinga ukuthi abalandeleli batshengise ukuthi bayakuthakazelela obethulela khona ngokutshaya umculo wakho. Lokhu kwenza ube ledlabuzane lomdladla wokuqhubekela phambili.
“Ekuhlabeleni sihlangana lenhlupho ezitshiyeneyo kodwa angideli ngiyaqhubeka ngisiyaphambili. Ngithi kuzulu sekelani umculo wabesifazana liwuphakamise ukuze ukhule.”
