uMthunywa
EtheI Ncube
KULAMAJAHA amathathu aphuma esabelweni seMatabeleland South esigabeni seMatobo asezakhele udumo ngomculo we-rhumba elizweni lakomakhelwane eSouth Africa nanko phela ingoma zabo zitshaywa emsakazweni lasezindaweni ezehlukeneyo kulelo.
Amajaha la, ahlabela i-rhumba abalisa uMthimani Mox Bekithemba Moyo, Themba Ngwenya loMelusi Dube bona ababumba iqembu labo elithi Ngwenya Brothers.
UMthunywa uxhumane lomunye wabahlabeleli laba uMthimani Moyo oveze ukuba kabapheli moya kwezomculo njalo bazalazo.
“Saqala ukuhlabela ngo 2016 lapho esakhupha khona amadlalade amabili, kuthe 2018 ngabambana leqembu leMatopo Rocking Stars sapheka iCD ethi uThemba Ngwenya.
Uqhubekele phambili eveza ukuthi uzulu uyawujabulela umculo wabo.
“Kulengoma yethu ephume khathesi ethi ‘Wakhala kabuhlungu’ leyo isihluphile bayayithenga abantu hatshi kancane, khathesi siyithengisa ngama-clips wonke umuntu oyizwayo uhle athi ngithumelani yonke ayithenge khonapho khonapho. Silwisa ukuthi ingoma zethu zibuye ekhaya sidlalwe khona,” kutsho uMoyo.
Ubikele uMthunywa ukuthi loba indima le inzima kodwa bazimisele ukuthi labo baze baziwe indawana zonke.
“Umculo wethu we-rhumba kunzima ukuthi abahlabeleli abadala bawamukele kodwa okusipha ithemba yikuba abantu bawamukela ngezandla zombili umculo wethu okwenza sibe ledlabuzane lokwenza ngcono kumadlalade ethu azayo,” kuphetha uMoyo.
