uMthunywa
YiNtatheli kaMthunywa
IQEMBU leNkululeko Yabatsha School of Arts (Iyasa) liyathokoza ngokuthi inengi labantu lamukele kuhle ingoma yalo entsha ethi “Babizeni Bonke”.
Ingoma le, eyethulwe ebulenjini be-YouTube ngoNhlangula, iyavutha emsakazweni yakuleli ebalisa iSkyz Metro leKhulumani FM njalo isisabalele lakumakhasi amanengi ebulenjini.
Ku-YouTube, ingoma le isibonwe amahlandla edlula i-2 700. Ividiyo yengoma ibukisa indawo ezitshiyeneyo elokitshini leMzilikazi, eMakokoba laseBarbourfields.
Iqembu le-Iyasa libukise njalo imvunulo ye-Africa, eyezikhathi zama-1960s, eyayithandwa kakhulu emalokitshini.
Ekhuluma lentatheli yephephandaba ngeviki edluleyo, uDube uthe ingoma le igxile ekukhuthazeni abantu ukuthi baziqhenye, baqakathekise isiko lemvelaphi yabo.
Uthe nxa umuntu ebukele ividiyo le, uyazibonela ukuthi ukuziqhenya ngesiko kuqakathekile.
Ingoma le, ethi “Babizeni Bonke” iphethe indikimba yokuziqhenya lokuzethemba,” kutsho uDube.
“Ikhuluma ngobuhle bedolobho lethu lakoBulawayo lelizwe leZimbabwe. Abantu bayayithakazelela.”
UDube, ongumhlonitshwa kwezomculo lokulondozwa kwesiko, uthe ividiyo ka “Babizeni Bonke” ibaluleke kakhulu ngoba iphakamisa ithalenta lakoBulawayo, okuyikho okumele kwenziwe ngabalandeli bezomculo.
“Kubalulekile ukuthi abaculi bethu babelokukholwa ukuthi umsebenzini wabo uyasekelwa,” nguDube lo.
