uMthunywa
Bongani Ndlovu
BEKUNGABIZWA ozwayo ngoLwesine emini enkundleni yeSomhlolo Stadium eLupane lapho iSt Luke’s United FC enqobe khona iTshongogwe United nge 4-1 kumdlalo wenkezo yenkululeko.
Abantu bebeyinhlabathi kaTshangani kulinkundla bezosekela amaqembu aziwa ngokuligiqa ibhola kulindawo alethalenta elingasekelwa kangako emdlalweni.
Umqeqetshi weqembu leSt Luke’s FC, uLobukhosi Ndlela ngemva kokuthwala inkezo kaZibuse uthe sebezabusa kokuphela kunguqu yeLupane.
“Kuyasithokozisa ukuthwala inkezo ye-Independence ngoba kutshengisa ukuba iqembu lisaqinile njalo lizimisele ukwenza umsebenzi wesizini yeLeague ezayo,” ngumqeqetshi uNdlela lowo.
“Ukunqoba kumnandi ngakho thina njengeqembu sesazitshela ukuba inkezo leyi ngeyethu ngakho ngithanda ukubonga abadlali bethu ngokudlala ngokukhulu ukuzimisela langokufeza amaphupho abo okunqoba njalo ngithanda ukubatshayela ihlombe,” kutsho uNdlela.
Umqeqetshi weqembu leTshongogwe FC uBukhosi Khumalo ubikele iphephandaba likazulu ukuba ulokukhulu ukujabula ngomdlalo.
Uthe ngaphandle kokungaphumeleli, uyaziqhenya ngeqembu lakhe.
“Ngithabe njengalabo abanqobileyo. Ngiyaziqhenya ngabafana bami ngoba besiqala ukudlalela linkezo njalo sidlale saze sayafika emdlalweni wokucina ngaphandle kokunganqobi sisuke sifunde indlela ezintsha zokudlala njalo sathola imiklomelo yamabhola lemali engangeRTGS$100,” kuveza uKhumalo.
UMqondisi wenkezo le, uAberson Mahlangu ubikele intatheli ukuba bekungumbukiso omuhle kakhulu njalo benelise ukubona umthombo wamathalenta akusasa.
“Umdlalo ubumuhle kakhulu njalo senelisile ukubona ukuba siqine kanganani. Abadlali balaso isiphiwo sokudlala ibhola njalo kuyathabisa ukubona intsha isenza okuhle phandle ngeziphiwo sekungathi lesizini yeLeague eqalayo emavikini alandelayo ingahlabusa,” kuphetha uMahlangu.
