uMthunywa
Blessing Moyo
INHLANGANISO ebona ngezokulima eye-Agritex ikhuthaza abalimi ukuba balime ihanyanisi lapho abalime khona imibhida ngoba iyaxotsha izibungu ezihlasela imbhida futhi ingenza umlimi azitshayele imali.
Ekhuluma loMthunywa Nkosazana Treggy Mpofu onguHorticulture Specialist uthe abalima imibhida kabahlanyele ihanyanisi emaceleni kwembhida yabo ukuze ixotshe izibungwana eziyihlaselayo.
“Khathesi yisikhathi sezibungu njalo lomuthi wakhona uyadula. Umlimi engazenzela owakhe umuthi ngokuhlanyela ihanyanisi engasoze imhluphe njalo azaphinda ayidle.
“Ihanyanisi ungayihlanyela kawubi lohlupho lwezibungu embhideni ngoba ilomnuko ohitsha izibungu lezo. Ngakho umlimi angayihlanyela lapho afake khona imibhida izibungwana lezi azisondeli zihle zibaleke,” kuchasisa uNkszn Mpofu.
uNkosazana Treggy Mpofu onguHorticulture Specialist
Uqhubeke etshela abalimi ukuthi ukulima ihanyanisi kwenza umlimi angabi lendleko ezinengi zokuthenga imithi.
“Umlimi kumele abone ukuba akakhiphi imali enengi ethenga imithi eyemali ezadlula isivuno sakhe ngakho kungcono ukuba uvikele izilimo zakho kulokuthi akhuphe imali esethenga imithi yezibungu yena esenelisa ukuhlanyela ihanyanisi ezamsiza lasesitshebeni iphinde incedise lasekwakheni umzimba.
Uphethe ngokuthi ihanyanisi ayisiyo yokuxotsha izibungu kuphela kodwa umlimi angazitshayela imali enhle ngokuyilima ayithengise ngoba ilomkambo omuhle kakhulu.
“Umlimi ulakho ukuzitshayela imali enhle angayihlanyela kuhle ihanyanisi yakhe ngoba ayidingi imithi eminengi ngoba yona ngokwayo ixotsha izibungu ezingayihlasela kungakho umlimi kasebenzise indleko ezinengi nxa eyilimile,” kuphetha uNkszn Mpofu.
