Fungai Muderere
BAMENZA umdlali ongelancedo, baphikelela besithi kabamncengi kodwa khathesi sebekhala ezimathonsi ngoba usehambile.
Yikho okwenzakala enkambeni yeqembu leHighlanders kulandela ukusuka kukaDevine Mhindirira, nanko uhambe mahala njalo lomgcinisihlalo uKenneth Mhlophe ubika ukuthi bayazisola ngalokhu.
UMhlophe wethule ngenhliziyo ebuhlungu ukuthi basele bekhotha udiwo olomileyo ngenxa yokuthi iqembu kalitholanga ngitsho indibilitshi ethengayo ngemva kokulolonga umdlali lo. Ukhulume lokhu phambili kwamalunga eqembu emhlanganweni we- Extraordinary General Meeting (EGM) ngempelaviki.
UMhindirira usekuqembu leFC Platinum.
“Phezulu kwakho konke, isimo senguqu kuleli siveza ukuthi ukuthengiswa kwabadlali yikho okuletha imali emaqenjini. Ngaphandle kokwehlukana loMhindirira labanye abadlali, iHighlanders yehluleke ukuthola imali nanko uhambe mahala,” nguMhlophe lo.
Umgcinisihlalo weBosso lo ubeke isicelo kwamanye amaqembu ePremier Soccer League (PSL) ukuthi angavumi ukuthi kube lomkhuba wokuthi kuyathengwa kumbe kuthathwe abadlali abasuka kwamanye amaqembu bezimele bodwa.
“IHighlanders icela wonke amalunga ePSL ukuthi akhuthaze ukuqhutshwa kwebhizimusi ngokwenqabela ukuthengwa kwabadlali abazimele bodwa uma kuvuma. Ukufuqela abadlali ukuthi bengasayini kumbe basuke emaqenjini abakuwo kumele kuvalwe.
“Ngokunjalo, iHighlanders izasungula uhlelo olutsha lwesivumelwano phakathi kwayo labadlali abakhona labazabuya eqenjini. Ukuphumelela kwaloluhlelo kuzagxila kusekelo lwabadlali ngokwabo, amalunga eqembu labalandeli.”
UMhindirira wabangumdlali ozimele yedwa ngemva kokuphela kwesivumelwano sakhe leHighlanders mhlaka 30 Nhlangula lonyaka. Lokhu kwadala ukuthi ahugwe ngamaqembu amabili iFC Platinum leNgezi Platinum Stars.
Umdlali lo, odlala esesiswini senkundla, wayeyinsika yokuqina kweqembu eliqeqetshwa nguKelvin Kaindu njalo ukusuka kwakhe kutshiye isikhala esizavaleka nzima kuBosso.
Ubengumdlali obalelwa kwabadlala kuhle kusukela ngesizini edluleyo njalo uKaindu kazange akufihle ukuthi umfuna eqenjini kodwa, uhambe kunjalo.
