uMthunywa
Thokozile Mbedzi
ZISAKHAKHAMELE izakhamizi zesigabeni seMusingarimi koChireya, eGokwe ngemva kokuba enye indoda eleminyaka engu-52 itshaye ixhegu elileminyaka engu-75 lafa kubangwa ukuthi belilungisa amalahle ensimini yakhe.
Kubikwa mhlaka 5 Nkwenkwezi uMunemo Alex Vurayayi oleminyaka engu-75 ubegamula inkuni ukuze alungise amalahle waselandwa nguDeans Machimbira oleminyaka engu-52 yokuzalwa ngehola letshumi ekuseni emethesa icala lokwenzela amalahle emasimini yakhe.
Ababili laba baxabana kakhulu bacina sebebambana besilwa. Kuzwakale ukuthi uMachimbira wafuqela uVurayayi phansi andubana amkhahlele ikhanda ngezicathulo.
Isikhulumi samapholisa eNkabazwe uInspector Emmanuel Mahoko ubikele intatheli ukuthi uMachimbira ebona uVurayayi engasabiseli wamtshiya elele phansi wamfulathela.
Kubikwa uVurayayi wasala wathwalelwa emzini wakhe lapho adlulela khona.
uInspector Emmanuel Mahoko
“UMachimbira usesezandleni zamapholisa njalo uyawancedisa ekuchwayisiseni.
“Uzulu ukhuthazwa ukuba axwayane lodlame ngazo zonke izikhathi ukuze singalahlekelwa yimpilo mahlayana nje. Ababili laba njengabantu abadala babelakho ukuthi bakhulumisane bazwane.
“Amapholisa axwayisa uzulu ukuba ukulwa akuxazululi inkinga kodwa kwenza indaba ibe nkulu ingasaxazululeki lula,” kuphetha uInsp Mahoko.
