Ethel Ncube
ZITSHE amathe izakhamizi zeNsuza kulandela ukuzwa ngexhegu elileminyaka engu-72 elidlwengule umntwana oleminyaka engu-12 yokuzalwa qede lamnika isivalamlomo sempuphu.
Ithumba leli libhokoke kuviki ephelileyo umamangala esencwebe omunye enkonzweni ukuthi wahlukuluzwa.
Kuvele ukuba ngesikhathi lokhu kusenzakala, umamangala wayesele lomnewabo, ugogo wakhe evakatshele kweleSouth Africa ngoMabasa.
Umetheswacala uEdwin Mpofu wavakatshela komamangala, uthe ekhonale umamangala wasecela impuphu ngoba bengela ngakibo. Kubikwa umetheswacala wathi abuye emzini wakhe ezothatha kanti yena wayevele eseluke icebo lakhe lokuthi kumele ayibhadalele leyompuphu.
Umamangala uthe esesiyathatha impuphu wathola umetheswacala ehlezi phezu kombheda wathi kasondele amtshengise imilayezo ethunyelwe ngugogo wakhe eGoli. Uthe esephansi kwakhe wakhipha ingqamu walaya umamangala ukuthi ahlubule impahla wamdlwengula kanye andubana amlaye ukuthi angavele abikele abantu ngalokhu uyambulala.
Kubikwa ekuphendukeni kukagogo kuyonale inyanga basuka besiya enkonzweni lapho afika wabikela omunye indaba le yahle yasiwa ezandleni zamapholisa amhambisa esibhedlela seSt Luke’s ukuthi ayehlolwa.
Isikhulumi samapholisa eMatabeleland North uInspector Glory Banda uphawule ngecala leli elilokhu lisahluzisiswa ngamapholisa.
“Sichwayisisa icala lendoda eleminyaka engu-72 okucatshangelwa ukuthi idlwengule umntwana oleminyaka engu-12.
“Njengamapholisa eMatabeleland North sibonga uzulu ngokusipha imbiko etshiyeneyo mayelana lamacala adalwa ngabantu endaweni abahlala kuzo.
“Labo abahlukumezana abesifazana bazabhekana lengalo yomthetho,” kuphetha uInsp Banda.
