uMthunywa
Ethel Ncube
KULEXHEGU elileminyaka yokuzwala engu-64 leMlowizi eGwanda elimiswe phambi komthethwandaba lisetheswa icala lokudlwengulwa abazukulu balo ababili andubana libanike isivalamlomo seziwiji.
Umsolwa esingeke samqamba ngebizo lakhe, ngenhloso yokuvikela omamangala kubikwa wahlukuluza abazukulu bakhe abangamankazana ababili omunye oleminyaka engu-13 lomunye oleminyaka engu-11.
Umantshi uNkosazana Lerato Nyathi uzwe ukuthi umsolwa lo ubedlwengula abazukulu bakhe amahlandla amanengi kusukela ngenyanga kaNhlolanja kusiya kunyanga kaMpandula nyakenye.
Kuzwakale ukuthi umsolwa lo wabiza omunye wabazukulu bakhe omdala ngesikhathi ugogo wakhe ephumile wamtshela ukuthi usekhulile sokumele aye laye emacansini. Kubikwa umzukulu wakwala lokho kodwa umsolwa wambamba ngesandla wamfuqela embhedeni wakhe wamdlengula andubana amlaye ukuthi angatsheli muntu ngesenzo lesi.
Umtshutshisi kulelicala uNkosazana Faith Mutukwa uqhubekele phambili echaza ukuba umsolwa wenza indlela efanayo wadlwengula umzukulu wesibili.
“Umsolwa wathi ngelinye ilanga ugogo ephumile njalo wabiza umzukulu owesibili laye wafika wamdlengulwa wathi eqeda wamnika isivalamlomo seziwiji.
Njengenja ethi inganqoba ithambo iyajayela kubikwa umsolwa wayesehlala esithi ugogo angavele aphume egumeni asale edlwengula abazukulu laba.
Kubikwa ithumba lize labhokoka unina wabantwana laba evakatshile evela eGoli.
Kuzwakale ukuthi omamangala batshela unina ukuthi uyisemkhulu uhlala ebahlukuluza zonke izikhathi ugogo wabo angaphuma. Unina wabo wahle wayabikela amapholisa okuyikho okwenza umsolwa wabotshwa.
Umantshi udlulisele phambili ukuthoniswa kwecala leli kumhlaka 22 Nhlangula njalo umsolwa uzabuya evela entolongweni.
