uMthunywa
Nkosilathi Sibanda
KUSELE amalanga ambalwa ukuthi kuqale imidlalo yomqhudelwano we-Africa Cup of Nations, lomqeqetshi wamaWarriors usebike ukuba akusimo esihle sokuthi alolonge iqembu lesizwe ukuthi liyenqoba eCameroon.
Imidlalo iqala mhlaka 9 Zibandlela.
Umqeqetshi wamaWarriors uNorman Mapeza usekhethe iqembu lakhe lokucina labadlali abangamatshumi amabili lantathu kumidlalo yeAfcon.
UMapeza ubelesibindi sokukhetha iqembu labadlali abangajwayelekanga ngemva kokuba abadlali abambalwa abamqoka bephume ngenxa yezizatho ezehlukeneyo.
Umdlali we-Aston Villa uMarvellous Nakamba, Marshall Munetsi (Stade de Reims), Brendan Galloway (Plymouth Argyle) bakhitshiwe eqenjini ngenxa yokulimala.
Ukaputeni weWigan Athletic, uTendayi Darikwa, ucele ukuthi akhululwe ufuna ukukhangelana lemuli yakhe, ikanti uKhama Billiat (Kaizer Chiefs) wabika kudala ukuthi usetshiyane lokudlalela ilizwe.
Kulumqhudelwano kuzakhethwa abadlali abane abadlalela kuligi yakuleli. Abadlali ababalisa u-Admiral Muskwe, uKundai Benyu, uDavid Moyo, uMartin Mapisa lo-Ishmael Wadi bazadlala okokuqala kulumqhudelwano.
UBenyu ubengezelelwe ngomzuzu wokucina eqenjini ngemva kokuthi uMapeza ecabange ukuletha elinye ithalenta phakathi kwenkundla.
UTeenage Hadebe, owakhutha ukuyahlangana labanye enkambeni uyingxenye yeqembu elikhethiweyo.
UKnowledge Musona uzakuba ngukaputeni waleliqembu okwesithathu kulandelana kulumqhudelwano.
Iqembu lamaWarriors lizadibana leSenegal emdlalweni walo wakuqala mhlaka 10 Zibandlela.
Umdlalo wabo olandelayo bazawudlala leqembu leMalawi ngemva kwamalanga amane ngaphambi kokuthi baqede umzuliswano wokuqala leGuinea mhlaka 18 Zibandlela.
Abadlali bama-Warriors:
Onozinti: Petros Mhari (FC Platinum), Martin Mapisa (FC Zamora), Talbert Shumba (Free State Stars).
Imvimbi: Peter Muduwa (Highlanders), Alec Mudimu (Torpedo Kutaisi), Takudzwa Chimwemwe (Nkana), Jordan Zemura (AFC Bournemouth), Godknows Muriwa (Dynamos), Gerald Takwara (Venda Football Academy), Teenage Hadebe (Houston Dynamo), Bruce Kangwa (Azam), Onismor Bhasera (Supersport United)
Esiswini: Kelvin Madzongwe (FC Platinum), Thabani Kamusoko (Zesco United), Never Tigere (Azam), Kudakwashe Mahachi (Supersport United), Ishmael Wadi (JDR Stars), Kundai Benyu (Vestra).
Abagadli: Admiral Muskwe (Luton Town), Prince Dube (Azam), David Moyo (Hamilton Academical), Knowledge Musona (C) (Al Tai), Tinotenda Kadewere (Olympique Lyonnais).
